立場新聞 Stand News

延續689施政 「奶粉」有冇毒 港人要諗清楚

2016/12/19 — 6:57

曾俊華, 梁振英, 林鄭月娥,

曾俊華, 梁振英, 林鄭月娥,

鬍鬚曾向中央請辭,遲遲未批,梁營中人迅速放箭,指衝燈者死。另一邊廂聲稱官到無求退休在即的林鄭,就準備上京面聖,表白去馬心迹。至於葉劉,唔Campaign由自可,一出閘就脫腳,皆因得罪人多,此人格局太小,要威逞強,相信冇機會。如果建制出兩人,應該會係林鄭對鬍鬚,好多人以為是但一個勝出都OK,咁就大鑊啦!因為林鄭今非昔比,因為她已進化成老董及689路線的繼承人。

林鄭鬍鬚差別 在於內部管治手法

坦白講,在政改、反港獨問題上,凡涉一國者權力收歸中央,邊個做特首都冇得再玩鋪勁,只能夠玩手指。8.31框架、一國兩制白皮書乃不可撼動,林鄭鬍鬚二人之差別,在於特區內部管治手法及核心施政綱領。對於曾蔭權、唐英年、曾俊華,凡曾出任過財政司者,均被批評為Hea做,而老左背後支持,由老董硂689到林鄭或葉劉,總會擺出一副訪貧問苦,24/7返工、身水身汗,大搞建屋運動、工業政策及科技躍進。

廣告

好多香港人以為係個人作風問題,唔明白這是特區兩條發展路線之爭,貫穿1996至2016,由老董、689到林鄭,是一條干預主義、大有為政府的計劃經濟路線。老董任內最上心是科技產業,搵田長霖等人大搞國際顧問團,妄想發展科技製造業,先有科技包裝數碼港地產項目,再有邀請漢鼎來港做圓晶生產,甚至準備給予土地、稅務及輸入外勞等優惠,結果這些益自己友的政策,給當時出任工商局長之曾俊華一手終止。曾蔭權年代唔再搞科技產業大躍進,結果畀老左們批評Hea做、冇Vision。

曾俊華阻老董益自己友

廣告

內地計劃經濟,共產黨指導下,要發展乜嘢產業,就可以有乜嘢公司出現,這叫官督商辦。香港奉行市場經濟多年,政府官僚根本冇能力、機制介入工業發展,指導企業投資方向。以科學園為例,租用之所謂科技公司,大家睇睇有幾多係做研發、生產,有幾多只係用來傾生意的showroom。近年本地最大科技業是為女士打Botox,於是這些公司掛着美容科技招牌進駐科學園,試問納稅人血汗錢是否應該用來資助美容科技產業呢?老董年代搞的九龍塘innocenter,大家去門口睇睇水牌,究竟是否在協助start up,數碼港今日變成偷情勝地,因為無人去所以最適合同小三去酒店短敍。仲有林鄭當年主催的活化古蹟,這些本來屬於公眾的地方,有幾多被香港富二代餐飲業集團所佔據?

鬍鬚曾再阻港版淡馬錫

每逢聽到政客大吹大擂政府如何有所作為,搞工業、文化、創新、研發,就知道一班利益集團拿納稅人金錢去開飯。港英「餘孽」唔多buy計劃經濟呢一套,所以就被攻擊為Hea做。香港人要想清楚,冇真正普選、行政機關冇真正問責性,由政府帶頭搞科技、工業、文化產業,最後只會變成官商勾結利益集團,南韓、印尼、泰國在亞洲金融風暴後全面暴露出產業政策勾結真面目。689想搞港版淡馬錫,將納稅人金錢在內地進行策略性投資,澳門已先行一步,財政儲備投資在廣東,結果又係比鬍鬚曾一手終結,恨得背後支持689奪權之利益集團牙癢癢。平情而論,內地貪腐嚴重,連港大投資的深圳醫院都變無底洞,香港人係咪真心想行此老董死路。

林鄭背後集結了梁粉、紅色群眾、老董大躍進思維,湊合而成「奶粉」,以延續689施政,究竟「奶粉」有冇毒,香港人要諗清楚。

文章原刊蘋果日報

發表意見