立場新聞 Stand News

張超雄,請不要當選

2016/9/2 — 14:10

張超雄

張超雄

看民調,張超雄應該會爭小小而不能當選。

雖然四年前,我是投張超雄的。

就算四年後今日,沒有後悔。

廣告

但我還是希望他不會當選。

認識這個人是因為一個訪問,和他的女兒一起的一個訪問,然後網上Wiki,在加州定居期間,為華人爭取權益,州政府定了9月13日為Dr.Fernando Day(張超雄日),好似好勁咁。

廣告

雨傘期間,我每日放工會去金鐘走一轉,旺角有事發生時會去旺角。

純粹走走,用我自己的方法支持而已。

十次有兩次會看到張超雄,最多機會會在絕食者Benny前面見到。

「去大台啦,呢度邊有人睇到你呀,死蠢。」

其次是長毛,至於其他議員通常在大台才見到。

從特殊學校的朋友口中知道他為殘疾學校的幫助,從社工朋友口中知道他如何直間接幫助社工界,從港鐵車箱中聽到他如何幫助老人院個案,均和當天雨傘看見他在灣仔警處前的張超雄印象接近。

「宣傳多啲啦,唔走出泥邊有人睇到你呀,死蠢。」

昨日立場出左篇訪問,睇完,感觸良多。

是否用非暴力做抗爭就是跟不上時代?

是否堅持普世價值對人就是別人口中的左膠?

從政學做人。

其實,我們的生活都是學做人。

「人地擺明搵你著數,仲同佢地講原則?」

「公司搵到幾多關你X事,洗X搵條命博咩!」

「唔好俾錢啲乞兒呀,佢地有集團操控㗎。」

張超雄就係一個好人,喺一個咁樣既社會,喺一個咁樣既議會,仲要努力堅持自己原則做落去,太疲倦了吧。

我有一些建議,如果你做到就叻仔:

開立法會就應該訓下覺,休息下,養生。

表面上話幫你爭取,立法會上發下言話支持,實際就投反對票,又呃到選民,又唔會得罪商家,學下工聯會,咪唔洗俾D商家話你社福界長毛,向你施壓囉。你睇下佢地幾時有公開話過工聯會。

唔好再幫小眾弱勢,由佢地死,因為當中可能有啲係呃飯食,一個都唔好幫,窮人就應該受欺壓。

唔好再用個身去擋人,俾共產黨啲狗話你助長暴力,俾激進話你阻住曬,吃力不討好,你覺得你保護緊佢地?傻啦,佢地只會覺得你係左膠。

表面上支持普世價值,實際放棄原則,做一個表面既議員,舒服好多。

攔人撞玻璃俾人話左膠,幫難民就俾人話佢幫假難民,俾人喺議會笑佢個女⋯⋯

張超雄,請不要當選。

這個社會,需要的不是張超雄,弱勢社群就由佢地死,因為我覺得後生仔先可以改變成個社會,需要時就可以傷害別人。真假難民,大陸人,新移民都唔係人,趕走曬佢地。弱勢社群不會令社會經濟發展,我們只需要錢,需要主權,其他的不要跟我說。

社會有人講很多大道理,有人很多理論,有人覺得其他人都是死蠢,有人覺得其他人跟不上時代。

我覺得,人,必需與時並進,但有些價值觀應該要堅守至生命結束前一刻,三十年,四十年後都不會改變的。

「如果活著能坦白,舊日所相信價值不必接受時代的糟蹋」

咁辛苦,為咩?

 

 

發表意見