立場新聞 Stand News

影相有乜問題

2019/10/9 — 16:00

作者攝

作者攝

見到網上對答,有「中立」人士咁講:「影相俾人打冇問題,警察執法打人有問題,咩邏輯?」

廣告

唔講「警察執法打人有問題」,因為如果認為「警察執法時打人係冇問題」嘅,其實已經有問題。我係想講「影相俾人打」嘅問題。

即係咁,有班人經常喺最多女生出現嘅地方專偷影裙底,一次,你喝佢,佢笑騎騎走咗;二次,你再喝佢,佢又笑騎騎走咗;三次,另一個嚟,你知係同一幫人,圍住佢,叫佢攞手機睇影咗乜,佢唔俾,你圍住佢,搵警察,警察嚟到,帶佢離開,但唔係查佢有冇偷影裙底,就咁放佢走;四次,又同一幫另一個嚟偷影裙底,你唔搵警察,因為上次警察放佢哋走,你搶佢手機,因為太斯文,搶唔到,俾佢走甩咗;冇幾耐見到有個網頁 post 咗咁多日好多裙底相,你嬲唔嬲?

廣告

到咗第五次,又一個嚟,見住佢用手機影裙底,你圍住佢,搶到佢手機,打爆佢部手機,警告佢哋班人唔好再嚟偷影裙底,放咗佢走。點知轉頭另一個網頁又有剛才嗰啲裙底相,原來佢影嘅時候幾時上咗雲端。

好嘞,第六次,另一個人又嚟,你明知係佢嗰班人,佢一攞部手機出嚟,你仲唔打柒佢?

「打人係唔啱」,講得好簡單。不過,上面所講打人個邏輯就係咁簡單!

我都曾經喺示威現場影大頭相,但都先會問問當事人可唔可以影。偷影嗰啲咩用心?攞去做乜?

套用返藍營同警謊嘅邏輯,你唔去現場做啲唔恰當嘅嘢,咪冇事囉!

發表意見