立場新聞 Stand News

思想圍牆

2016/12/4 — 19:38

Eugen Anghel / flickr

Eugen Anghel / flickr

非黑即白,凡事二分係近年常見嘅溝通方式。無意中睇到朋友楊天帥兩年前 TED 演講,完全點出自己嘅問題。凡事為駁而駁,唔聽人講。說到底只有兩大原因:

  1. Show Off,覺得自己比其他人 superior。言談中俾人嘅感覺係我勁過你,識野多過你。

  2. Feel Good,講完一大輪自己論點之後,覺得自己好爽。

正因為咁,真正溝通已經唔再重要,取而代之係宣泄不滿情緒。呢種思維或多或少都同教育有關。中學會考寫議論文時,總唔明白點解一定要揀一個立場,唔可以有中間?教育令非黑即白既思維根深蒂固咁影響幾代人。我地聽人地嘅諗法時,唔再係為溝通。反而係捨本逐末地想駁贏人。

不過人與人之間溝通唔應該係咁,社會亦唔係咁運作。要串贏人嘅思維根本無助思想傳達,反而變到同 Donald Trump 一樣,以 Build a wall 隔絕非我族類。分別只不過係一道牆係用磚頭砌成,另一道係限制自己思想。拋開咗溝通嘅目標之一:動之以情,說之以理,結果必然係不歡而散。

廣告

返去最核心嘅問題,究竟溝通係為乜?係想表達自己,定係交換諗法?天帥當頭棒喝:溝通最重要唔係要說服人,而係說服自己。就係要聽其他人講法,思考過後,先可以接受到新思維,或者肯定自己諗法。演員 Tom Walker 扮演嘅​新聞報道員 Jonathan Pie 對美國大選嘅睇法就更加一針見血:美國左翼面對嘅問題係認為不合己見嘅就唔應該接受,任何人一講就會被圍攻——咁仲邊有人敢發表自己意見?惟有係大選中,冇壓力下以選票發表己見。

香港政情都有同一現象。執政者就係睇準我地情緒弱點,將戰場焦點由政制轉移到大眾。面對一般市民撐政府意見,多數人自然反應已經鬧咗左膠、五毛、熱狗先——冇晒正常溝通,只剩低謾罵恥笑,冇進步、冇改變、冇合作、冇了解。有調查發現,市民支持釋法同反對相若,而蘋果新聞留言全部都問題指向「假民意」。反對派繼續無視現實,最終只會落得同美國自由派同一下場——變咗 Trump 呢類投機者做總統,正中中央下懷。

廣告

政治從來都係一場馬拉松,所謂得民心得天下。有幾多人會真係聽下唔同人諗法,嘗試解釋俾佢地聽建制派政客其實一直呃緊佢地?冇,因為我地只係諗到自己。思維不變,我地又可以點行落去? 

發表意見