立場新聞 Stand News

怪案測智商

2017/8/17 — 14:13

林子健

林子健

一單怪案,證明香港冇得救,大部份人都係低能。事實、猜測、證據、意見、中文全都不懂,又學人出嚟講。

11/8

成個記者會,只有一個事實可以確定,其他都係估計

廣告

事實:十字釘和傷痕

估計:
1.跨境犯法
2.林生講大話
3.林生冇講大話,但捉佢啲人講大話
4.林生冇講大話,但精神有問題
5.仲有九萬個可能

廣告

點解第一日咁多人肯定係跨境犯法,對面又有咁多人話佢講大話呢?

到今日民主黨話唔肯認錯,話有受害人一定要幫,大佬,冇人叫你唔幫,你開記者會亦冇問題,但你只可以陳述事實,邊個叫你下定論?兩位資深嘅都識講未知邊個做,個民間廉政專員誓神劈願話係強力部門跨境犯法,成班泛民又跟住佢癲話證據確鑿。

13/8

李家超局長:大量搜證工作包括翻查附近的閉路電視、尋找目擊者及做調查問卷,惟現階段未有資料顯示有報稱被帶走的經過。

林卓廷:保安局長李家超指目前未有證據顯示林子健被帶走的經過,是妄下判斷,做法不專業,令人遺憾。因爲人證、21口釘子也是證據,形容李家超說法片面偏頗。他又指該言論隱含着事件沒有發生的意思,批評李家超作爲保安局長,發表該言論是不負責任。

阿民間專員,李家超局長邊隻字係判斷?成句都係事實陳述,證據搵到就搵到,未搵到就未搵到,你覺得佢有偏見,但佢真係冇表達,而你咁諗本身都係偏見。你覺得佢應該咁講:「雖然未搵到證據,但一定會搵到,就算搵唔到都一定係跨境犯法」咁係專業?

阿前調查主任,人證係孤證,釘子只係證明佢受傷,你唔再喺執法機構做都係好事。有冇人可以同佢補習吓常識?

14/8

22名泛民聯署去信約見保安局局長李家超,指近日林子健疑被內地人員擄走及虐打,加上過去曾發生「銅鑼灣書店」等事件,均顯示內地有人員來港執行任務,要求李家超及警方代表盡快會面,討論香港警方面對該等情況時,是否能有效保護市民安全。

唉,集體失智,何其壯觀?人哋查緊你嘈咩啫,如果開會,警察除咗話查緊仲可以答你咩?搵埋你哋一齊查好唔好?

14/8

《傳真社》搜集出事地點閉路電視 未見有人被擄走

嚟到呢一刻,只有一件事可以肯定,就係之前所有定論都是廢的,包括話佢真同話佢假,因為隨時有新證據。

咁有咗呢啲片,有咩結論呢?答案都係冇

1.片段有盲點,唔係100%無疑點

2.就算段片係100%無疑點,嗰條街冇出事,唔代表下一條街冇。我接受人記錯。

3.就算完全冇俾人夾,呢部份講大話,唔代表冇俾人打,冇俾人夾但俾人打一樣咁大鑊

我明白點解建制派咁開心,但真係未夠證據講發生咩事,同一把尺,仍然唔應該下定論。

戴咗帽段片,有九萬幾人當自己係影像分析機器,話入面個人肥咗、瘦咗、個身厚咗、對腳幼咗,個八字冇咁內,又有人話個八字內咗,前後左右快慢乜Q都有人講。大佬,曲鏡頭嚟架,條行人路唔係直架,你要做影像分析,首先要移除個曲率,再set返啱比例,唔係冇可能,唔係你做到囉。

最無厘頭係有人鬧傳真社,話個source係警察,配合佢宣傳,仲有啲話係串通。拜託,用吓個腦,一小時記者會->醫院->報警->第一次口供->警察可以做嘢,咁長時間,其實如果你想,呢段時間入面你都可以反轉條街。又話唔係警察俾片,係提示佢去搵料,拜託,最大嘅source咪林生囉,正常智商聽佢講完十分鐘都知邊度搵料啦。

呢個過程完全合理,亦有商戶證實記者早到過警察,但合理唔代表係事實,我唔係話一定冇串通。但咁大嘅指控,係唔係要有非常嚴謹證據先可以推翻上面個過程呢?

同埋真係串通都好啦,啲料係唔係事實先?記者報事實有乜問題?你如果質疑真確性ok 冇問題,係都要講動機,人哋咩動機關你咩事啫?係唔係所有獨家料都要諗

有不良動機?九唔搭八。

15/8

周二(15日)凌晨約3時,重案組探員駕駛警車,將被捕的林子健由旺角警署,押送到位於馬鞍山錦豐苑的寓所搜屋。

好多人話做咩凌晨3時開記者會,又話咁急開都冇料到。天啊,點會冇料到呀,你自己唔夠班聽唔出咋。

警察話「事主當日自行乘車,安全離開旺角」,呢個point,傅真社啲片冇架,即係警察知得多過你同傳真社,天大嘅料。

有人話警察唔應該譴責林子健,係未審先判。聽真啲丫唔該,警察係話嚴厲譴責個行為,唔係譴責林生個人,你可以話佢暗示,但佢冇講實林生一定錯。

民主黨衰咗又唔認,你唔係衰幫人,係衰無據指控,未審先判。

講開民主黨,真係感慨。好多人唔滿意佢哋路線,對我嚟講,佢哋路線冇問題,最大問題係廢人太多。個民間廉政專員今次食哂,政壇廢物。資深嗰兩個,我唔理你哋係因為黨友定係欠咗佢所以咁幫,而家呢單公共事件,公眾利益在前,用嚟還人情架咩?就算你信佢,你哋嘅專業應該有話你知證據不足。咁大單嘢,個主席第5日先出現,出嚟話唔可以太快下定論,大佬,你哋做先架,道歉咗先講其他啦。民主黨有冇副主席?仲有其他乳鴿,上面講啲白痴嘢都中得7788,香港市民靠你哋?

對我嚟講,林生點離開旺角係次要,成件事關鍵係啲十字釘,未解釋到,一日都係冇結論。

我唔係無聊打咁多字,係從呢件事睇到香港真係冇得救。上面全部嘢都係中三學生應有嘅水平,香港嘅大律師、律師、前廉署調查主任、議員、政黨中人、政治新星、學者、民主鬥士偏偏冇咁嘅水平。

每次有爭議事件,我都會得失幾個朋友,我唔識講嘢,係難聽啲,易得罪人,但大家講公眾利益,可唔可以講理據唔好講感覺?我講嘢衰,有冇錯先?有錯你咪講囉,我其實都幾喜歡人哋話我知有咩錯。

無論係指控建制,指控泛民,指控傳媒,都要有十足證據,呢啲唔係香港價值?阿爺亂嚟,你又可以亂嚟?咁同佢有咩分別?一國兩制唔係佢唔俾你,係你自己唔要。

香港冇得救,唔係因為阿爺,係因為建制泛民傳媒大部份圈內人嘅智商唔符合基本水平。
 

發表意見