立場新聞 Stand News

想正義 要飲孟婆湯?

2015/6/17 — 10:52

【閻羅王:你哋而家可以決定下世投胎,個世界嗰資源點分配:不過講明,你一飲咗孟婆湯就咩都唔記得,亦唔知投胎後會變成咩人】


-------------
想正義要飲孟婆湯?-羅爾斯的「無知之幕」

講起社會公義,又點可以唔提寫出當代西方政治哲學最重要嘅一本書《正義論》(A Theory of Justice)嘅John Rawls,羅爾斯 (1921-2002)。 當代政治哲學傾向將「社會公義」視為一個「分配正義」(distributive justice)嘅問題:只要有一個公平嘅分配程序分配社會啲資源,個結果就係正義嘅。

廣告

John Rawls 嘅思路都係一樣:佢認為,只有當一個社會嘅基本制度,係依據正義嘅原則(principles of justice)來安排,而呢啲原則,又係通過一個公平嘅程序決定出來,咁個社會就係「正義」嘅。

通過咩程序先可以搵到呢啲「正義原則」呢?就係透個佢有名嘅「原初立場」(Original Position)呢個思想實驗,咁我而家用個中國神話版,令大家容易理解:

廣告

假設我哋都瓜晒,閻羅王就話:「見你班友生前,供樓供到死都未供完,我俾機會你班友決定,下世生存係一個點樣嘅社會,個社會嗰資源點分配。不過講明,你一飲咗孟婆湯就咩都唔記得,仲要唔知你投胎後,有幾叻幾蠢,係咪殘廢、樣子如何、有無事業線、老豆係窮鬼定超級有錢佬!係咪好公平?」

John Rawls 認為,喺咁嘅情況我哋都會做最壞打算:假設自己係最唔好彩最弱勢嗰個,然後決定「給予最弱勢嘅人最有利嘅保障」。(咁又係吖,你估劉嗚煒知道自己下世變做蠢仔毒撚,佢仲會唔會話$3000夠買樓?)

再具體啲,即係如果制度A 之下,最有錢果個有一百蚊,最弱勢果個得十蚊;而制度B之下社會最有錢果個得七十蚊但最弱勢果個可以有三十蚊,咁我哋都會揀B。

此外,我哋都會決定要平等咁給予每個公民最大最多嘅公民及政治自由,以及平等無歧視嘅工作機會。根據呢幾條原則來運作嘅社會就係「正義」嘅。

 

文:專寫政治哲學的C.L.

【你又會點決定?一齊留言瘋狂討論!】

*當然, John Rawls無咁叻諗到「孟婆湯」呢個concept,佢係《正義論》叫大家想像有一塊「無知之幕」(Veil of Ignorance),遮咗我哋一部分嘅知識,令我哋唔知自己係邊個、咩種族膚色性別、來自咩家庭、咩社會地位、智商幾多、有咩特別嘅才華或者身體缺憾。令我哋係討論時,所作的決定唔會偏坦任何人。

原刊於9olitics facebook page

發表意見