立場新聞 Stand News

成田機場的偶遇

2016/5/7 — 2:00

劉德華 (桃組劇照)

劉德華 (桃組劇照)

近日香港某撚樣濫用特權繞過安檢一事,令我想起十年前喺東京成田機場嘅一件事。

*   *   *

2006年,我同當時女友史高治去東京旅行。當時我第二次去東京(第一次都係同佢去,相隔八年,關係由普通同學變咗情侶;再相隔十年變成陌路人……你話人生幾咁變幻無常呢……真係《史詩式愛情》咁樣樣),加上個旅行計劃咗成年,我哋抱住非常雀躍嘅心情落機。

廣告

踏進入境大堂,首先望見嘅係日本國民入境嘅櫃位,小貓三四隻,無乜人。嗰陣東京下午三點,心諗可以快快手手出境,出到去池袋只係五六點,仲有半日玩。

再行入啲去到旅客入境嘅一邊……屌你老母……嗰邊起碼有二百幾三百人排緊隊等入境,好似長洲太平清醮咁墟冚。見到蛇餅繞咗四五圈、長龍見唔到盡頭,我嘅心情當堂由富士山山頂跌咗落美國大峽谷底部。屌你老母,我好撚憎等同排隊(留意:等同排隊係兩個概念嚟。你等女友使唔使排隊?除非你女友係公廁囉),又唔企得耐,但無辦法,焗排。

廣告

嗰陣無智能手機,無得一路打機一路等,百無聊賴下只好重溫正文社本旅遊書。更慘係,排咗大半個鐘,條龍只係郁咗少少。佢嗰陣好搞嘢嫁,入境大堂國民入境同旅客入境啲櫃位,你我相隔多麼遠,明明國民入境嗰邊無人,都無疏導啲旅客去嗰啲櫃位……我哋都算好彩,唔使排隊尾,後面仲有五六十人。依我推算,隊尾啲人嗰晚要喺入境大堂度露宿,等第二朝再入境。

*   *   *

咁等下、等下再等下,我已經將正文社本書由頭到尾睇咗五次,寫滿晒筆記同貼晒旗仔,幾乎可以同女友互相玩背默。當我以心情極度唔耐煩嘅心情睇緊第六次,女友拍一拍我。

史:「拍我做乜鬼?」

高治:「劉德華呀!」

史:「乜撚嘢劉德華呀?排隊到你矇撚咗,有幻覺?」

高治指指後兩行:「你睇下嗰邊。」

呢個時候,我發覺排緊隊嘅人,全部嘅注意力都去晒隊後方嘅同一點。

我望真啲。嘩,屌!喺人頭之間,我望到佢!真係劉德華!劉德華!劉德華!劉德華!劉德華!劉德華!劉德華!劉德華!劉德華!劉德華!

四大天皇之中,原本我最中意郭富城,不過喺2006年嗰陣劉德華已經係四個中唯一一個仲有實務嘅*。佢嗰陣已經拎咗影帝兩次、傑青、最佳男歌手,已經(同仍然)係國際巨星。所以見到劉德華,仲要係喺咁無聊嘅情況下,真係幾高興。佢排我後兩行,同我都幾近。原來條友佢都幾瘦下,可能嗰陣掛住造人,造足幾年先成功……

大堂嘅人,有六七成都係香港人。見到劉德華,大家彷彿唔記得自己喺度排緊一條排唔完嘅隊,個個都興奮到爆。好多人都唔知/唔理入境大堂唔畀影相,拎住部相機不斷影劉德華。有啲人無預備白紙同簽名筆,就咁遞咗本正文社嘅旅遊書畀佢用普通原子筆簽名(屌,邊個會預計自己排隊入境見到劉德華呀?我出街都冇預過見到林嘉欣……到今日都未遇到)。

劉德華一路面帶微笑。有人叫佢影合照,佢影;要求喺正文社本書簽名(btw,正文社喺呢篇出現咗四次,我就快收佢錢),照簽。傾計,照傾,仲聽到佢同啲人大笑。屌你老母,可謂黃大仙。有一下,我望住佢,佢望住我,我哋四目交投,然後我扯咗……唔係,然後佢對我微笑咗一下。

無耐,有入境廳(定航空公司)嘅職員行過嚟。佢用手勢同簡單英文叫啲港燦咪撚再影相,之後再喺劉德華耳邊講咗幾句嘢,再指指國民入境同旅客入境之間嘅vip/crew入境通道。

劉德華諗都唔諗,好快就回一句: “No thanks. It’s absolutely fine.”然後雙手合十,做咗一個答謝嘅手勢。

對方再問多次,好似係問“are you sure?”

劉德華好誠懇咁再答:“Yes, I am ok to stay here.”

跟住對方走咗,劉德華就繼續同我哋班蟻民一齊排隊。都幾肯定,對方係問劉德華要唔要用專用通道,唔使排隊。

女友細細聲話:「當住咁多人面,劉德華可能唔好意思走捷徑。嘻嘻。」

我同佢講:「屌,又唔係劉德華主動提出,係人哋覺得佢係貴賓,尊重佢所以畀呢個offer佢。佢又已經排咗成個鐘,如果我係佢,人哋畀個方便門,我就一定會用。你用唔用?」

真人真事,我目睹成個過程,劉德華嘅拒絕嘅表情好撚誠懇。如果你話佢做戲,咁佢演技真係值世界級。當年Facebook未流行,人類生活遇到嘅細節未必可以咁巨細無遺記錄低。劉德華用快速通道,過咗半日就無人再記得。同埋,我覺得,如果係人哋offer畀你,而你無用任何嘢去回報/要求/報答呢樣嘢,用,係正常。

結果,我排咗個幾鐘,五點先入到境。我等唔到劉德華出境再同佢影相,我拎行李嗰陣已經六點,出到池袋,八點,第一日就咁泡湯。

我唔知劉德華係為咗乜嘢原因唔用快速通道。我淨係知客觀事實係:佢無用到,選擇咗排隊。

*   *   *

都唔好話有權定無權,連人哋提供畀佢嘅offer、一個可以節省個幾鐘等候時間嘅offer,佢都唔拎。對劉德華嚟講,可能係一件小事。但對我嚟講,劉德華嘅整體品德水平已經上到去人類嘅頂峰。後嚟2007年發生劉德華勇救歌迷事件,都更加鞏固劉德華喺我心目中正氣嘅形象。嗰啲乜嘢唔認結婚,已經無乜所謂。

「做人最怕aim high shoot low。人哋覺得你點,有時係唔係你做得好唔好咁簡單,仲要加埋人哋對你嘅期望。」朋友LT經常掛喺咀邊。

香港人嘅要求同期望已經畀啲冚家剷推到低無可低。公眾人物-演員好、政治人物好-喺要喺公眾心目中拎分,做好公關,只要(1)出乎意料做啲(2)有同理心、正直不阿或者見義勇為嘅事,講兩句人話,大家已經好受落。你睇下黎明。我覺得佢叻嘅地方,係佢無一錯(取消演唱會)再錯落去。道句歉,對好多人嚟講,真係好難。

而家有啲達官貴人、乜嘢龍蝦夫人,為咗一己私慾,居然要求人哋做啲唔啱規矩、違反既定程序嘅嘢,人哋連番拒絕,仲不斷施壓吹雞喊打喊殺打電話(are you fucking serious……2016年仲有個廿歲、喺外國讀書嘅女每晚要打畀老竇老母講daddy I love you, good bye and good night),直至達到自己無理嘅要求為止先肯收手。畀人踢爆,不斷捏造故事同謊言,仲要相關機構一齊陪佢癲,夾埋佢死撐同執屎。你自己仆街好啦,仲拉埋其他人落水。

呢啲人,真係冚家剷嚟。通常被鬧冚家剷嘅對象係一個人嚟,因為你太憎佢所以玩連坐法,想佢冚家剷。而家呢家人,一家幾口都係冚家剷嚟,你想佢冚家冚家剷。有人話乜嘢禍不及妻兒,但普天之下,只有呢家人,我想佢冚家冚家剷。

*   *   *

*四大天皇:我心目中嘅次序為郭富城、張學友、劉德華同黎明。我覺得黎明唔靚仔,唔識唱歌,唔識跳舞,唔識做戲,但今日先知,佢識PR。

2006年嗰陣,張學友同黎明已經半淡出。而郭富城上親報紙個女友都唔同人,可謂不務正業咗十幾年……講笑啫,人哋都係影帝嚟。

(文章原刊作者FACEBOOK

(圖源:  http://www.jctravel.com.tw/eWeb_jc/IMGDB/000002/00006975.JPG

 

發表意見