立場新聞 Stand News

我想我哋唔好呃人啫,好難咩?

2017/2/3 — 0:36

曾俊華

曾俊華

《明報》政情專欄作者「李先知」今天指,目前未見有傳統左派組織公開支持曾俊華,但有民主派選委不諱言,泛民一定會湊足票推曾俊華入閘, 「佢(曾俊華)自己搞唔掂,一定湊夠票畀佢」。

2月2日報道〈明報引民主派選委:一定湊夠提名票給曾俊華 戴耀廷「民投」計劃或成下台階〉

睇到呢單新聞我真係著曬。吓?民主派選委?睇過~ 邊位呀?D300+開咁多次會,我都冇聽過有咁嘅共識喎。

我真係好想同呢一位「民主派選委」講:

廣告

老老豆豆,想造王唔係問題,但係D300+出嚟選嘅時候就唔好咁大聲講乜嘢真普選、乜嘢換人換制度、乜嘢撤回831框架啦。你係咪直頭講話要造王咁囉。冇問題㗎喎。我哋個界別有位大前輩叫蔡堅醫生,佢都擺到明話佢鍾意喇沙仔啦,佢都選到㗎喎。

做人誠實啲,唔好呃人先得格。

廣告

唔通選之前就民主300+,選之後就變成造王300+。咁樣樣?

喂阿哥,唔係話唔俾你提名John Tsang,但係最最最起碼,你都等人地出左政綱,睇下對唔對路,再討價還價丫?宜家個政綱連影都未見,D300+又未有共識,你就咁猴擒,撲出嚟倒票比佢,話幫人包底,宜家咩意思先。

仲有,唔好再同我講乜野「擴大選舉競爭性」。

呢句真係好難聽,尤其係從民主派選委口中講出黎更加係難聽過粗口。究竟乜嘢叫做「有競爭性」先。

唔係人多就叫做有競爭嘅,如果個個出嚟都係企硬831框架,個個橙都一樣爛到入心,有競爭同冇競爭又有乜嘢分別呢?喂阿哥,連梁振英同中聯辦都係咁講,話想要一場「有競爭性嘅選舉」咁架喎,你唔係跟佢果套,為呢個特首選舉塗脂抺粉下馬。

小圈子就小圈子,我地認左佢啦好冇呀。

我哋要諗嘅,唔係「點樣令呢個小圈子睇起上嚟好似冇咁小圈子」而係諗下「點樣將我哋手上呢一個小圈子嘅權力廢除」。

而方法就係,唔好咁快決定你嘅提名同投票取向,從而增加我哋同各個參選人談判嘅籌碼,迫使佢哋正面回應香港人對於民主、同埋真普選嘅訴求。

你究竟真唔明定唔想明呀。

#寫完之後用咗同樣咁耐嘅時間去刪除啲粗口
#對唔住我今次真係嬲
#點解要迫我爆seed
#要接受訪問就唔好匿名啦咁鬼祟做咩啫

發表意見