立場新聞 Stand News

我扒冷:薯片叔逆轉勝

2017/1/16 — 7:21

今日老左為林鄭造勢,在梁振英打柴後,深知左口左面者必定冇民望唔夠票,於是一計不成又生一計,乃以政務官出身之林鄭作幌子,扶植佢登基,意圖維持西環及梁粉治港。林鄭甘心做魔鬼交易,權力野心使然,此乃人之常情,況且林鄭當年在僭建問題上成功助689隊冧唐唐,有恩在先,今日689交棒予她,亦屬應有之義,猶如貝里雅與白高敦、普京與梅德偉傑夫,根本毋須借天父旨意來過橋,徒惹爭議。

林鄭競選班底「out」

問題係望望林鄭之競選班底,唔單止聞到陣「西環」味,而更大陣係「out」味。政改期間被西環及689策反之前民主派湯家驊、狄志遠、黃成智等人,呢棚「民主思路loser」唔單止選舉大敗,成為笑柄,在傳媒眼中級數已同馮煒光接近,哈!竟然又搭上林鄭翻生,如果將來入埋政府,就真係得啖笑。

廣告

第二個out就係一棚由四十幾五十歲人組成的「三十會」,李律仁走位靈活,見財爺形勢不妙就立即過底去林鄭競選辦,被踢爆後支吾以對,青年才俊蠱惑到出面,真係令人搖頭嘆息。呢個溫和蠱惑仔班底如果再加上梁粉骨幹及西環系人馬如袁國強、陳茂波、張志剛、羅范、劉江華,即使加多件友好民主黨羅致光、真心膠梁粉何喜華,都沖唔去陣怪味。咁不如唔好換人囉,至少舊689頂多做五年依規定必走,呢個新689可能要捱十年,香港人仲大鑊!

林鄭太恨做特首,聽從西環擺佈,一開波就俾班「政壇波羅雞」埋身,加上梁粉味,她相信仍未覺察到其累積多年儲起的個人聲望正以日計地迅速蒸發。

廣告

選舉show高下立見

薯片叔反而輕裝上路,無人無物,只有一個舊政助幫手,但卻予人新鮮感,去Unwire IT人網站公司做Facebook live,回應林鄭天父旨意論,一句「我冇問過佢」,認真之餘相當爆笑,而林鄭就由狄志遠帶住探阿伯,十足區議員選舉工程,同樣選舉show,高下立見。

如果薯片叔真係眾籌選舉經費,實掂,猶如當年蔡英文「小豬」籌款,凡捐款者代表對競選工程有ownership,必會上心自發協助宣傳。薯片叔如能公開徵集選舉口號、poster、banner,甚至助選義工,咁就好玩。

越campaign民望越低

當民望高之人堅持入閘,冇中央加持又俾建制群插反是優勢,林鄭有班左佬及民主思路loser幫手,形象必然out,越campaign民望必然越低,而選舉工程反會令薯片叔更得民心,到時中央會認真考慮如何運用手上鐵票。

曾俊華乃大智若愚之人,相反林鄭乃鋒芒盡露,一個舉重若輕,一個要用盡力氣話俾天下人知,自己如何好武功,睥睨一切。當年橋王許仕仁為她冠名「好打得」,其實是反諷之言,並非讚美。政務官對她敬而遠之,並非如她所說因為要求高,而是對人態度苛刻,毫無體恤之心。葉劉公眾形象雖不及她,相反凡跟過她在保安部門工作之政務官,卻對葉劉支持有加。做阿頭,唔可能靠自己一個打十個,而係令其他人心甘情願付出百分之二百努力。

香港目前政治形勢瞬息萬變,薯片叔表面處於弱勢,林鄭辭官備選立即被《文匯》、《大公》老左高高舉起,大家似乎忘記了同一棚人,一個月前曾經也高高舉起過一位叫689的人!

如果今日落注,我會扒冷買薯片叔。

 

(文章原刊蘋果日報)

發表意見