立場新聞 Stand News

我投曾俊華 是為了香港人的希望

2017/3/24 — 11:43

2017年3月19日,特首參選人曾俊華選舉論壇會場外會見記者。

2017年3月19日,特首參選人曾俊華選舉論壇會場外會見記者。

【文:陳曦彤(教育界選委)】

星期日投票,我嗰票會投俾曾俊華。

我從來唔係less evil/ 策略派,因為曾俊華隨時更evil。係暗票制度下,亦唔存在被綑綁既問題(我粒聲唔出投廢票邊個知?)。甚至乎,經過幾次論壇同候選人會面,我深信林鄭當選,對教育界可能係更好既結果。

廣告

即使係咁,我仍然選擇票投薯片。咁係因為,我想還香港人一個希望。

由參選小圈子,成為D300一分子開始,我就不停提醒自己,呢個其實係屎坑,跳左入去就周身屎,唯一可以令自己乾淨啲既方法,就係係過程中積極參與,認真思考倡議每一步,令選民同香港人明白,你並唔係享受特權,而係運用選委權力,為香港爭取制度上的改變。雖然唔可能係即時既變革,但至少要令香港人對前景保有希望同信心。

廣告

如果教育界選委令候選人承諾增撥資源,係俾各位教育同工係工作前景上一個希望;如果D300+有效分配提名,送曬胡官薯片入閘,係俾民主派支持者係同中共博奕上一個希望。咁我會話,D300票投薯片呢個訊息,係俾所有香港人,係民主路上一個希望;

我想令大家見到,香港人仍然可以透過現有制度既參與,透過民意既力量,衝擊高牆,撼動政權。就算得番1%勝出既可能,我地D300既選委,都會盡力去捍衛;只要令香港人見到𥌓光,係此時此刻,咩都係值得。

哪怕今次票數不足落敗,但輸既,只係曾俊華。而代表民主,代表香港人既力量,只要有香港人支持,同樣可以捲土重來;無論係區議會、立法會定選委會,我地要用越黎越多既選票同議席,開拓香港民主政制既前路。

我相信,投俾曾俊華,係延續香港人對香港既希望,對民主既希望。呢一點,係污穢既我,係呢個時空下,理所當然地為香港做既事。

發表意見