立場新聞 Stand News

我的八九六四

2019/6/3 — 20:54

八九嗰年,大家五月嘅時候,已經知道天安門事件,好多學生、市民都聚集咗喺天安門。

當時,我啱啱開始做國泰航空嘅地勤,啱啱開始習慣返夜班,我哋同事成日會喺休息室聚埋食飯、睇電視,當時已經有部分關心政治嘅同事會好凝重咁睇相關嘅新聞,而身邊有好多人開口埋口講移民,對香港嘅前景有好多懷疑,人心惶惶。中共鎮壓嘅第二日,當時已經有同事準備咗一堆黑布,放喺休息室,俾大家攞嚟扣喺制服上面,幾日之間,大家都扣哂黑布,意義係想大家記得血腥鎮壓呢件事。

如果一個政權連面對自己錯誤嘅勇氣都無,佢可以點樣進步?

廣告

時間過去咗,有啲人選擇淡忘,但我覺得我想繼續做微小嘅事,可能係參與六四活動、關注中國人權運動等等,因為我想俾力量同支持一班失去親人嘅死難者家屬。後嚟,到我成為咗工會代表,我覺得佢哋追求公義、公平嘅精神係同我哋嘅信念係無分別。

係呀!我哋好微小,但我哋要堅持落去,喺中國境內目前仲可以講六四嘅地方,為佢哋呼冤,唔好讓事件無聲無息,否則不公不義會持續落去,甚至有一日會殺到埋身。

廣告

過咗三十年,對我嚟講,六四轉化成一種唔放棄嘅精神。喺追求職場公義嘅過程中,我成日同自己講,微小嘅事都要做,出咗聲可能未必有用,但我都要堅持、要講,我諗呢個係其中一個我傳承六四嘅方式 — 面對公義,我唔會放棄。

作者製圖

作者製圖

 

#我的八九六四 #六月四日 #維園見

作者 Facebook

發表意見