立場新聞 Stand News

我老母給眾人的一席話

2019/7/3 — 19:24

【文:LG】

612我媽媽孤身走我路,一支箭衝咗出金鐘,搞到我人都未醒就出去金鐘茫茫人海下上演一幕「尋找老母的故事」,可謂「母親坦蕩蕩,女兒白癡癡」。尋晚佢又一句問我「聽日會唔會出?」我好奇之下同佢做咗個專訪,想比大家知道,真正做人母親的想法。

其實609、616,連612都出過黎,點解今日仲要行出黎?相信好多人都想問,但答案亦好簡單,「政府對於五大訴求一樣都無實現!」吾母激動地答,「香港係一個窗口,有其獨立性,點解要抑制佢嘅自由?咪由佢自己行囉!」

廣告

但作為一個50後,真係理解今時今日衝緊或者企喺前線嘅年輕人諗緊嘅野?「2014年雨傘革命,我覺得佢地好傻,好唔應該,因為和理非唔應該係咁;但今次609遊行之後,我見到啲差人肆無忌憚,宣示警權,我話你聽唔做得就唔做得!呢個係乜野社會?」

從此,佢對年輕人有另一種睇法,「我哋享受到呢個社會嘅成果,但佢哋冇,我唔可以比佢哋去受苦。」

廣告

點解?「因為我哋和理非非得太多年,我哋覺得冇所謂啦,差不多啦,有錢搵就搵啦,無諗過後生個批會接得幾辛苦!」

未來... 我都唔敢諗,「我唔可以接受一個咁樣嘅未來囉,我哋係有責任去保護年輕人,因為我哋行錯咗,我哋和理非非得太耐,我哋覺得唔燒到我地就算,差不多就算... 我哋差不多得太耐喇!」

但有個90後嘅女兒,仲想衝;作為一個媽媽,會有啲咩想同喺前線嘅一班兒女講?「我希望佢哋唔好吓吓去衝,唔係去情緒發洩,我理解佢哋既無奈,但作為一個媽媽,作為一個50後,我只可以講你哋必須要清楚自己做緊乜嘢,要知道自己承受返呢個責任,無人幫到佢」⭐️

我好幸運,有一個媽媽做我同伴。但外面有好多人未必,可能仲要同佢嘅屋企人對抗,咁點算?「如果你屋企人同你唔同立場,做自己可以做嘅事,唔好去抝,無必要,用自己嘅能力去做可以做嘅事」

自己個女都係一個情緒病患者,作為母親,又有乜野可以同一眾受社會氛圍困擾,仲打算用自己生命去控訴嘅人講?「輕生或易或難,但而家已經走咗3個?除咗社會記得之外,仲有啲乜?你嘅包袱比咗人地,難道有改變過?點解唔自己行出嚟去衝,去表達你嘅訴求?」

以下呢番話,我已經唔知係對出面嘅人講定對我講,「如果你話要衝,我一定會擔心,但你話冇事,我就會相信,我唯有相信,我冇嘢可以做,但我永遠係你嘅後盾,你返到嚟我就會Backup你」

「我唔可以企喺前線同你地衝,但我會喺後面出一分力,因為我要比你哋知道,你哋並不孤單」

 

#我有一個自由閪母親 #而家共享母親一席話
#記住我哋都有媽媽 #做咩都好 #記得報平安

發表意見