立場新聞 Stand News

我與我 18 歲的孩子

2019/7/3 — 19:47

圖片來源:joey kwok photography

圖片來源:joey kwok photography

【文:一位 40 歲媽媽】

我係一個 40 歲嘅媽媽,我想喺度分享過去嘅 6 月,我同我 18 歲嘅仔仔係點度過。希望籍住呢個分享,可以比更多家長或所謂嘅廢中,廢老知道同理解呢一班年輕人,希望大家真正明白,我哋係可以為佢哋做得更多。

6 月 9 日,我冇參與遊行,因為工作關係,而我 18 歲嘅仔仔,當日有出席活動,我那刻好感動,平常只會打機,睇電話嘅佢,今日,竟然懂得為香港出一分力,證明佢唔係廢青。但當晚,政府的回應係話之你哋一百人行出嚟,我要係咁就係咁,導致出現 12 號嘅大型訴求活動。當日,我都係金鐘……

廣告

6 月 12 號,我原本都要返工,但早上同仔仔溝通時,得知佢考試過後會出去金鐘支持活動,我知道後同佢講,你自己出去時要小心啲,我立刻向公司請假,安排好公司一啲工作,我立刻到金鐘同你會合。坦白講,即使我知道政府有問題,但我要返工,都未必會請假去到支持,如果唔係佢,我都會同一班廢中一樣,返工囉。而嗰一刻,我只係知道,佢需要我係佢身邊,需要保護佢,無論係身同心。

當日,我處理好工作後已經係下午 2 點,立刻就去到金鐘,時間大概係 3 點左右。係統一閘一出,見到嘅情景令我忍唔住喊,一班大概只有十幾歲嘅孩子,不斷地向在場人事要遮,要生理鹽水等嘅物資,睇到佢哋嗰種惶恐,焦急表情,我諗緊,佢哋啲家長呢?有無大人可以照顧佢哋?嗰刻,我已見到有好大煙係天橋方向漂過嚟,心已知道不妙,立刻打比仔仔,佢接聽後,我問佢喺邊,佢話位置喺中信,第二句,佢係叫我唔好過去搵佢,佢嗰邊好危險,一個 18 歲年輕人,竟然關心嘅唔係自己,係我!而第三句就已經係聽到電話嗰邊傳嚟:快啲走呀,快啲入去,有催淚彈……電話掛線。之後,我唔知可以點做,電話已接線唔通,只可以 send WhatsApp 及留言,叫佢安全後比電話我,我哋約好係邊度會合。嗰段時間,見到金鐘好亂,好多年輕人都唔知可以點,見到有喺太古廣場休息嘅,洗傷口嘅,洗眼睛嘅……而我就睇下有冇嘢可以幫到班年輕人,再等待呀仔消息。終於仔仔打比我,我哋相約咗喺地鐵站等,我遠處見到佢嗰陣,我已係跑埋去,攬住佢係咁摸下佢面同身,好擔心佢有無受傷,直至佢話:我無事呀!先放心。

廣告

到了 15 號,在工作中的我,接到仔仔電話,傳來抽泣聲,同我講,喺金鐘嗰個男仔去咗喇!我當時比唔到反應,而佢再問:點解呀!?究竟佢做錯啲咩?或者你哋無諗過件事原來對呢班年輕人有咁大衝擊,因為所謂大人世界,就係只會覺得自己做啱哂,食鹽多過你哋食米嘅思想,但佢哋話咗比我知,佢哋比我哋呢班大人,更有情有意,更單純,單純得,我覺得唔啱咪出聲囉,點解又話我哋唔啱呀?而我哋呢班自以為是嘅大人,又要諗會唔會得罪人,又要諗咁會唔會影響到自己,又要諗有無著數先做,倒頭嚟,咩都做唔到……

我想表達一個媽媽嘅心聲,如果你哋仲喺度懷疑同指責一班喺 7 月 1 日衝擊嘅年輕人,希望大家諗下,一班平時我哋眼中只會駁咀、打機、享受嘅廢青,點解今日,反而會冒險做一件有機會被捕,斷送自由嘅事?就知道,佢哋其實係懂分事非黑白,比我哋更勇敢去爭取,那怕佢哋嘅行為係幼嫩,但請唔好否定佢哋嘅出發點,因為佢哋同我哋所要嘅訴求係一樣。

其實你哋有無諗過,作為家長嘅你哋究竟想點?佢哋無所事事又話係廢青!佢哋為香港行出嚟又話佢哋攪事唔識諗!如果仲認為佢哋只聽大人說話做人,咁就有成就,我相信今日就唔會有呢個香港。希望大家能為孩子多出一分力,讓佢哋知道,失望唔緊要,我哋一班香港大人都會在旁守護,並肩而行。

發表意見