立場新聞 Stand News

我開始懷念 689

2017/1/13 — 12:14

林鄭就係嗰種為求目的,連宗教信仰(上帝叫我出嚟選)、親情(老公同仔送返大陸)、老闆(689-林鄭個選舉網站三個月前已經登記)、朋友(error 404......不存在)都可以一一出賣嘅人。你信佢會維護香港嘅所謂核心價值,尊重制度?一套戲兩個鐘,頭一個鐘爛到仆街,你期望後尾一個鐘會變經典?

不會。

香港唔係要一個能人做特首,要能人嘅係帝制-所以你讀中史治亂興衰,中國威威威,從來都係話皇帝點勁點勁,一句不提係制度所帶嚟。只要一個特首唔好亂開空頭支票(689)、亂撚咁嚟(董廢帝)、搞呢搞路搞風搞雨(689同董廢帝)、貪埋啲便宜同大錢(689同曾蔭權),香港自然會風調雨順,吉人天相-儘管我承認,1997年以後無例子可以支持呢點。

廣告

如果要數最佳嘅港督,麥理浩肯定係三甲(如果唔係第一)。佢建立嘅全部係制度:成立老廉、九年免費教育、提出「積極不干預主義」(佢下屬夏鼎基爵士)、改革社福制度。呢啲制度上嘅投資,為香港之後幾十年帶嚟豐厚嘅回報-到今日香港仲係食緊呢啲老本。

更何況,林鄭嘅所謂好打,只係唔理一切反對聲音、既有制度、規條法規,夾硬去實行一啲離地但會遺禍萬年嘅政策同項目:社福一刀切撥款、皇后碼頭、西九故宮。全部一脈相承。689個女嘅行李門,就係為咗顯示權力、為求快捷而破壞良好制度同法則嘅一個經典例子。

廣告

林鄭,同689係同一類人。不過,林鄭更加聰明、更加賤:回頭看,2014年嗰陣嘅政制改革,當年政改嘅領軍人馬-林鄭月娥,就係今日最大嘅得益者之一。你信唔信佢一早有計算過,政改拉倒,對自己最有利?總之,政改越fuck up就越好。你唔信唔緊要,反正我就信了。

制度係任何一個文明、成功國家嘅基石。而林鄭,就係一個唔尊重制度,以權力破壞制度嘅人。

好可悲,麥理浩有份留畀香港嘅嫁妝-廉潔、自由市場、法治,就係因為一班人渣,為咗要討好一個完全無制度可言,同帝制無異嘅國家,喺過去廿年一一斷送。點解呢?因為一個喺共產黨下無可能實行到、一個叫一國兩制嘅制度。(註)

林鄭,真係好撚噁心。

香港唔要一個能人做特首,更加唔要一個撚人做。林鄭絕對係一個撚人。

你心淡未?2017年3月26日前,我仲未想心淡。

由2003年開始,我幾乎年年都同自己講:放鬆啲,下年可能會好啲,又或者你就會心淡;結果到2014年居然要去瞓街。我愛香港,對呢個地方真係堅有感情。

最後,講白啲,如果胡鬚出嚟選,將會一條好簡單嘅路線選擇:將香港進一步推向政治爭拗主導,雞犬不寧永無寧日嘅地獄之路,又或是帶香港重回正軌,養精蓄銳恢復元氣嘅休養之途。

有句話叫做「條路自己揀,仆街唔好喊」。呢條路唔係自己揀,可惜仆咗街,一樣係天下同聲一哭。

講返標題:點解我懷念689?

因為佢連任,最多只係做五年。

-------

註:我打賭,香港最後一件、亦是最有價值嘅嫁妝-豐厚嘅財政儲備(約8600億,86之後十個0),政府將會透過各項大白象基建、與及民粹式社福政策,前者將錢送畀大陸嘅建設公司、一邊洗晒財政儲備佢。到時政府要靠舉債渡日,而當你嘅債係由一個債主買晒,你連春袋都畀佢渣住。

 

作者 facebook

發表意見