立場新聞 Stand News

或許去旺角食飯,係我係七月七號做得最錯的決定

2019/7/8 — 18:18

2019 年 7 月 7 日晚,旺角警民衝突

2019 年 7 月 7 日晚,旺角警民衝突

【文:Kathy Cheng】

七月七號晚上十點鐘,同男友由TOP商場離開,行到商場彌敦道出口。

突然間,右邊有成千個警察行過黎,無論行車線定行人路全部都係警察。

廣告

而佢地當時只得一個行為,持盾同警棍威嚇所有行人,無論你企行人路定馬路,無論你食完飯定行緊街,總之你係佢面前,就要走!

我當時行係行人路上,本打算去朗豪坊,逼住一直向前行。而班警係後面用比我地行路要更快既速度喝我地離開。要散到去邊?警方冇同我地講,只知道一班人係到揮武警棍同盾牌,好怕,所有人都好怕。

廣告

有人屋企係太子,想返去,但都被逼去油麻地方向,點返屋企?警察唔答。

行到惠豐中心對出的亞皆路街行人路,本以為唔係彌敦道無事,結果警方又進一步推進。我轉唔切方向,企唔穩,但一直俾警察用警棍指嚇。

佢地一直揮武,好似要打落黎咁。

我男友護住我一直向前行,但我真係重心唔穩行唔快,好快就俾警察包圍。

男友不忍我俾人推,同佢地理論,一個市民係旺角行街有咩錯?

佢地就對支警棍係我地眼前,話係咪想返差館?

果一刻好驚,好驚佢地用盾按我地係地下打。

我冇著黑衫、冇拎標語、冇嗌口號,我只係食個飯姐,我只係想買野刺激下消費姐,但我覺得我生命受到威脅,我唔明憑乜我要受到咁不禮貌既對待。

我拉住我男友向西洋菜街方向行,佢地一直用盾推我地,一直喝我地:「走啊!係咪唔走啊!」我大聲喊住咁同啊SIR講:「走緊啦啊SIR!走緊啦!我都係食完飯姐,我做錯左乜野呀?」有一兩個有掛證既警察係我地後面講:「唔好拗啦,快啲走」

最後我地行到西洋菜街終於班警察冇追上黎,我喊到收唔到聲,冇親身經歷過,你唔會明佢地有幾失控。我唔會再相信警察都有良知、有好人。我只係知道佢地袋住三萬蚊由納稅人俾既錢,但用槍指向市民。

我返到屋企,但我眼淚一直都停唔到,有冇人話俾我知,我可以點投訴?點可以攞返我既公義?

—————————————
更新
謝謝大家的關心及留言,由於數目眾多,請恕我無法一一回覆

目前搵片方面,仍未有由西洋菜街方向拍攝的片段,當時有位叔叔及女士手持手機拍片,如見到相關片段請跟我MESSENGER聯繫

有千言萬語想同大家講,但我覺得自己真係需要休息了,大家想推POST推啦,SHARE都可以,各位Take Care

(原文刊於作者facebook)

發表意見