立場新聞 Stand News

批CY干預港大副校任命 田北俊:非適度有為,是過度無謂

2015/8/28 — 11:55

經常和特首梁振英唱反調的自由黨榮譽主席田北俊,今日指梁振英近日「適度有為」的說法,是講一套做一套,令社會愈來愈分化,亦會出現適度有為「過頭」的情況。他指梁振英做了一些他自己認為是適度有為的事,但社會不認同,例如港大委任副校長一事,他認為不是「適度」,而是「過度無謂」,並稱據他理解,政府和中聯辦曾出手游說校委會成員。

政府、中聯辦游說拖延副校任命

田北俊今早在商台節目《在晴朗的一天出發》時以港大事件為例,節目後他詳細解釋:

廣告

「即係等埋首副校長呢件事,我嘅理解,就係政府同埋中聯辦,都有人游說過啲校委會成員,『不如等埋首副啦!唔好決定喇!如果決定係畀佢(陳文敏),不如唔好決定。』咁我就覺得,呢個係所謂適度有為?第一,我都唔覺得呢個係『有為』,第二,我亦覺得佢唔係『適度』,我覺得佢係『過度無謂』。」

他指在節目中指,事件令人覺得他「干預緊間大學」,「但行政長官或者政府就覺得係適度有為」。他指,港大校委會「等埋首席副校長」的理據,較建制派政改投票時說「等埋發叔」更離譜,因為首席副校長連人名都未有,卻要等到此人到位後才委任副校長。他指政府和中聯辦都有人曾經游說香港大學校務委員拖延副校任命,並質疑特首處理一些事情是過分適度有為:

廣告

「...『等埋首副』同立法會上次『等埋發叔』比仲離諎,發叔你都講得出,等埋(經民聯)劉皇發議員一個,都講得出佢個名吖嘛,而家等呢個首副,連個名都講唔出,根本嚟應徵嘅人都冇,根本都冇嘢等,搞到而家出嚟又話唔好等囉,9月份決定咯,咁又捱多咗一個月。」

免費電視牌事件 又變極度無為

田北俊再以免費電視牌照事件中,港視的司法覆核勝訴,法庭判決發還行政長官會同行政會議重新考慮申請,但政府又由「適度有為」變成「極度無為」,「既然輸咗,我就唔適度有為去處理,掉轉頭唔理,咁係咪即係『極度無為』?輸啲嘢就唔理,羸嗰啲就叫『適度有為』。」他批評梁振英講一套做一套:

「我哋察覺近年,總之佢認為啱佢嘅嘢就會做;他認為唔啱的就唔做。調返轉頭,譬如張震遠的個案(前商交所涉嫌欠薪事件),查咗兩年冇咗下文,咁呢個係咪『適度有為』?我哋質疑佢查咗出嚟就唔想採取行動,咁係咪『極度無為』吖?」

他又認為如梁振英想適度有為,也可約泛民政黨吃飯,在和諧氣氛中討論問題。田北俊在節目後指出,早前自由黨和梁振英晚宴,未有討論到黨主席鍾國斌「積極不干預」的觀點,但事隔兩日梁振英就撰文作出反駁,他笑指梁振英的做法,有助提高鍾國斌的知名度。

至於港澳辦副主任馮巍同民主黨會面,他認為是好事,指雙方可以更坦誠溝通,中央可以直接評估民主派。田北俊希望馮巍除了約見民主黨外,亦會約見所有在政改表決中投反對票的泛民議員,直接溝通,不需要透過梁振英或中聯辦了解他們的看法。

發表意見