立場新聞 Stand News

技術文 - 突破機構「港獨」調查

2017/1/25 — 20:08

作者製圖

作者製圖

今日突破機構公布咗一項「青少年對兩制落實與港獨意見」研究嘅結果。

【背景】

-調查喺16年10月6日至12月8日進行(剛好喺689宣布不連任前一日完結)

廣告

-調查對象係10-29歲青年,喺人流聚集地點進行調查,共1029人,

───

廣告

【結果】

-大部份人同意/非常同意:

(1) 香港喺文化及經濟上正趨向內地化

(2) 港人喺管治同言論上嘅自主空間正在收窄

-約60%人覺得自己係「香港人」(其他選擇4%中國人、26%中國香港人、12%香港中國人)

-係云云政治人物中,有16%揀689為「最影響我對港獨議題取態」嘅人。已經唔港獨嘅梁天琦有13%、冇講過港獨嘅游蕙禎+梁頌恒係6.2%、同港獨無關嘅黃之鋒係3.4%,熱普城派系(雙黃一陳一鄭松泰)夾埋係4.7%

-港獨定義不一:35%將佢覺得係堅建國(有軍隊嗰隻)、30%係完全自主內政嘅特別行政區、29%係城邦、6%係民族自決

-50%嘅人,喺係雨傘運動嗰陣開始留意港獨;另外有5%喺人大發表831框架之後開始。

───

【分析】

<唔該你好好檢討下>

若果我係中央,睇到呢個結果,第一時間係諗方法鏟除呢個突破機構-畢竟內地人解決問題嘅方法,就係解決啲提出/揭出問題嘅人。

第二時間,我會好好自我檢討。

點解有港獨?香港遊行示威唔係今日先有,但2003年71、到之後曾蔭權做特首,嗰十年八載的確無乜人講港獨。可能有個別人士提出,但完全無市場,大部份人覺得一國兩制係黃道正宗,只係特首(董建華)同啲官唔掂,只要換咗人,再等實行普選,一國兩制大抵上係最佳制度。

好啦,到咗2014年,共產黨宣布831框架,公然走普選數,然後689拒絕為港人爭取普選,爆起雨革。大部份原本對一國兩制仲心存僥倖嘅香港人,一舖夢醒。唔夢醒,一係因為根本冇醒過,一係只係覺得港獨不可行,又或者唔想因為制度改變而對自身嘅經濟利益有任何風險或影響。港獨又點少得689。點解佢做到特首?咪係中聯辦干預選舉嘅產物。

呢個調查證明,雨革同689,就係過去五年最重要嘅兩樣港獨催化劑。55%喺政改嗰陣(雨革同831)開始留意港獨、有16%揀689為「最影響我對港獨議題取態」嘅政治人物。呢兩樣嘢,係共產黨一手一腳製造,不假外人。中產黨過去五年起用689,西環系統肆無忌旦全天候干預特首內政同一切選舉,再走埋普選條數。換人,你換個更差;改革政制,你去走數;索性革命更換大制度,換撚走你。唯獨取消現行制度,先有機會拎到一啲原本香港人應該有嘅嘢。港獨浮現,理所當然。

即使認同自古以嚟香港係中國領土、即使基本法第一條寫明香港係某國不可分裂一部分,最尾係共產黨,一手將香港人推向港獨。

梁振英固然係港獨派最具影響力一員,但調查嘅分析(第10頁)發現梁振英對受訪者港獨傾向嘅影響,分野在統計上並不明顯:即係受佢影響嘅人,不會特別傾向港獨;不受佢影響嘅,亦不會特別不港獨。

整體嚟講,689過去幾年自以為是、自把自為,處處敵我分明,拒絕讓步及溝通,從來無為香港人發聲,對港獨冒起肯定有推波助瀾嘅作用。我敢擔保,未來五年、十年只要換上一個性格及行事方式差唔多嘅人做特首,再配合共產黨繼續干預香港事務,港獨思潮只會愈加根心蒂固。

試想下,一個2000年出世嘅後生仔,12歲踏入中學校門時就出現反國教運動,之後雨革、旺角掉磚、銅鑼灣書店事件、梁天琦DQ、梁游DQ,到佢22歲大學畢業投身社會,中間再經歷故宮興建、一地兩檢、輸入外勞等爭議,成長嘅一整個十年都沉淫喺港獨思潮。宏觀至整個社會氣候政治生態,微觀至社交媒體、朋輩,莫不對一國兩制,港人治港,高度自治嗤之以鼻,或視之為痴人說夢話,港獨又豈有回頭路?

早幾年,偶爾有朋友相約食飯時,帶來一兩個內地高官,名為交友,實為向香港各界收風。我每次一開頭都講「大陸唔好喺香港搞咁多嘢,由得我哋自己發揮」、「唔該大陸啲官收皮」、「香港啲嘢唔撚關你事」。聽到我咁講,對方通常無癮之極(另有少部分口說認同)。此乃由衷之言,我都唔理得你中唔中意聽。呢幾年嚟,共產黨對港干預愈加強勁,香港政府嘅管治水平江河日下,證明看法沒有錯。近年此等飯局已經懶得去,慳點口水。

共產黨,唔該你好好檢討下,重要還返個普選行政長官畀香港。諗真啲,會檢討嘅,就唔係共產黨。千錯萬錯,誰也會錯,就是共產黨不會錯。

<港獨定義不一,但不是偽命題>

對於青年對港獨定義不一,突破構機有以下睇法:

『突破機構事工研究發展經理陳競存表示,從是次研究可見,多數本地青年根本並不認同真正的香港獨立,「青年支持香港完全獨立」在過去一段時間明顯是被過度炒作,這個說法只是偽命題。』

我唔認同上述講法。打個比喻,大家對「靚女」嘅定義唔同,並不等同「邊條女最靚」係一個偽命題。不過,突破機構肯做呢個調查,已經功能無量。

呢個調查對於各大港獨團體有好大嘅啟示性。因為而家大家要做嘅,係認真咁為「港獨」下一個(1)清晰、具體,(2)容易理解及(3)受廣泛人接納嘅(4)權威定義。名不正,言不順,要推廣同實行港獨,要建基於大家對嗰樣嘢嘅理解大致相同。起樓要打好地基,唔係就變大陸嘅豆腐渣工程。

另外有條問題,係青年人對港獨關注組嘅取態(第8頁)。有70%無發現港獨關注組,有5%嘅參與港獨關注組取態。港獨團體點樣喺post-facebook 嘅網上世界宣揚政治議題,睇嚟係亦一大挑戰。

 

作者博客

發表意見