立場新聞 Stand News

投票破紀錄 人心不死

2015/11/23 — 6:35

傘運後第一次全港選舉終於舉行,結果投票率超過2003年七一後區選的44.1%,總投票人數約150萬人,創區議會選舉歷史紀錄,亦令好多評論員跌晒眼鏡。大家估計投票率低過上屆41.5%係有原因。不少人認為佔領運動及政改被否決後,爭拗告一段落,政治退潮。而689就一直宣傳專注民生,日日講起屋及土地供應,為淡化社會政治角力氣氛。建制派在競選策略上一樣採取「去政治化」,首先行動激進的愛字頭避戰,而參選者則避開論壇,以免炒起選舉氣氛,低調進行組織動員。

建制廣泛動員,意圖用選舉結果否定雨傘運動,乃意料之中,問題是佔領後689並冇真正落實「去政治化」、專注民生的口號,反而為咗個人連任私心,不斷發動新的鬥爭,令平靜下來的社會再度政治化。為了收拾反叛的大學生,伸出黑手入各院校,為鬥倒政見不同的陳文敏,不惜玩殘香港大學,一班梁粉知識分子變成爛仔,實在太難睇,連平時政見溫和的獅子山下一代中產,都頂唔順。最後為免拖累選情,北京向梁施壓押後委任李國章。本來梁粉也意圖將家長學校反TSA當作政治議題去鬥,根本就唔希望香港社會和諧。

政圈有一種講法話只要協助建制派勝出兩場選舉,北京就支持梁連任,我就唔多信。香港選舉工作由中聯辦掛帥,幾時輪到689揸旗,亦只有中聯辦可以協調、點得郁建制政黨妥協,同搞散泛民,而動員、催票、配票,政府更加無能為力。但689對本地選舉的而且確是有舉足輕重的影響,他是作為一個負面因素存在,梁營好鬥作風至今不改,動輒觸動市民政治神經,尤其低劣的政治手段乞人憎,變相製造政治對立氣氛,為反建制陣營造勢。

廣告

高投票率同市民反梁有極大關係,2007投票率低過四成,正因為當時政府民望高,政局平穩,於是用選票表達政治不滿的市民較少。區選投票率一貫與立法會選舉相差約十個百分點,而泛民在區選總得票又少於立會得票,這表示區選冇出來投票的是對地區事務冇興趣的年輕人及中產,今次出來投了抗議票,加上傘兵、本土、素人青年,拉闊了反建制光譜,高投票率下,泛民、傘兵總得票應該有斬獲,這對明年立法會選舉打下勝利基礎。

今非昔比,在現實政治環境下,高投票率未必能轉化為反建制陣營的議席,甚至重複2003年一役,令個別區議會變天,當中關乎大小形勢。從議席而言,2003泛民其實沒有大勝,只是氣勢上一時壓倒建制派,而在北京果斷撤換特首後,尖銳的對立矛盾消失,而建制派則重整旗鼓,大量投入資源培育社區幹事,用「非政治化」形象包裝,重奪議席,在2007年其實已接近全面收復失地,到2011年更加全面控制所有區議會。當建制派在地區執政後,另一改變是行政權力向建制派全面傾斜,新增一億地區撥款,變成他們的另類蛇齋餅糭。建制派同時自體繁殖出大量外圍文娛康體組織,申請公帑資助活動,組成樁腳利益集團。可以講今日泛民面對的地區大形勢,比2003年惡劣得多,情況就如雜牌軍香港隊對抗財大氣粗強國隊。

廣告

另一變數是建制派更加組織化及戰略化,泛民只是一個鬆散陣線,加上近年互相攻伐,內鬥勇武,放生外敵,客觀上削弱反建制陣營當選機會,今屆應有更多高票落選的個案。好多泛民支持者對此不滿,但大家有否想過,今時今日,泛民、傘兵、社運人面對的是一個國家機器,不是民建聯、工聯、經民聯。這些黨派已無實際意義,背後操控的政治機器,已不是本土政治力量,他們有各種方法協調、勸退、懲罰候選人,泛民無法相比。

執筆時點票仍未完成,區議會會唔會因破紀錄投票率而變天?才不會,但如果有幾件重量級人馬落選,如似當年葉國謙觀龍墮馬事件再現,咁就出番啖氣,假如今次梁美芬、蘇西智、彭長緯等輸比政治素人,就真係大快人心。至少證明雨傘之後,人心仍然不死。就如香港隊守和強國隊,自己出唔到線,但至少打出漂亮一仗。而這場仗,是會產生連鎖的政治後果,就是如果北京繼續支持梁振英「再接再厲」,則2016年立法會選舉,反建制陣營在689神功護體下,真係冇得輸。

原刊蘋果日報

發表意見