立場新聞 Stand News

抗爭新方向

2019/10/4 — 20:11

立場新聞圖片

立場新聞圖片

【文:無名的香港人】

其實過咗咁多個月和理非試過,暴力對抗試過,而家已經去到抗爭嘅樽頸位,淨返既就係不斷升級武力,但係論武力我哋呢邊永遠都唔夠啲狗黎,加埋佢地有政府阿爺加持,佢打你甚至乎殺咗你都冇罪,你鬧佢打佢就有罪,完全係雞蛋撞石頭,點睇都睇唔到希望,所以硬碰硬係咪我哋嚟緊唯一可以行嘅路呢?好希望大家可以諗一諗。每次見到各位手足受傷被捕都喊到停唔到,其實硬碰硬做到嘅效果就係引起世關注,呢一點已經做到,我諗大家係時候反思一下,改變策略,繼續硬碰硬只會停滯不前,我覺得我哋最成功嘅地方就係識得變通,肯放低唔輸得既面子,不斷進化。講到呢到大家可能想收我皮,希望可以睇埋落去...

入正題:

廣告

面對呢個腐敗不堪既警隊,啲人成日話想解散警隊,我好同意,亦都好想即刻解散,但理性啲咁分析幾乎冇可能發生,就算政府跪低應承解散警隊,搵咩人去做呢?所以呢排有啲反思,大家有冇諗過可以從內部擊潰,你見世界各地出現呢啲情況嘅時候都係要靠內部倒戈,印尼/烏克蘭,都係靠有良心軍人倒戈。其實大家點解唔試下從內部入手?具體方案有:

1. 嘗試集結仲有少少良心而又冇辭職嘅白警企係我地呢邊,未必需要佢地出面,但起碼有啲針幫手收料。

廣告

2. 其實好多人都係受軟唔受硬嘅,包括我哋自己,莫講話啲低智商嘅狗都唔例外。會唔會試下諗辦法拉攏或者分化下佢哋,唔好下下打打殺殺譴責佢地。回想返雨傘,點解相對無咁多黑狗浮現? 因為果時有軟攻,幫狗擔遮,畀水狗飲,佢哋啲人智商唔高,可以利用下呢點。

3. 全民投考警隊,知犧牲好大,冇人想做自己唔中意既工,冇人想同唔啱理念既人一齊做野,冇人想用自己前途去搏,完全明白。但留意到好大部分年輕人,大家都雄心壯志,為咗香港,冒著暴動罪十年,甚至乎連死都唔怕,只要信念夠堅定,咁怕咩組隊做狗臥底,加上人工高福利好,何樂而不為呢?當時機成熟,一班志同道合既人,到時就可以黎個內部大清洗。

可能大家會覺得不切實際,解決唔到當務之急。但君子報仇十年未晚,呢場仗一定係持久戰,一定要長遠鋪排。差佬要瓦解一個黑社會字頭都唔係一朝一夕嘅事啦。點解唔願意花啲時間去鋪排呢?當然唔係話唔再繼續抗爭,只係轉左打法,希望大家可以裏應外合去打贏呢場仗。

香港人加油!!
 

發表意見