立場新聞 Stand News

拉布與鄭子誠現象

2016/7/18 — 7:19

梁振英(左)、曾鈺成(右)

梁振英(左)、曾鈺成(右)

本屆立法會曲終人散,好多熟口熟面的議員退下火線,但因為怪醫梁家騮拉布阻止醫委會改革條例,最後連同議員告別的惜別議案都冇時間提出。今屆議會4年盤點,最大特色相信就是點法定人數,超過1,400次,另外終止待續辯論及其發言時間亦創新高,加加埋埋全部都係拉布戰後果。梁振英及建制派一直想修改議事規則阻止拉布,其實,此舉等如議員引刀自宮,政府當然想,但要成事相信好困難。

回顧立法會歷史,拉布現象屬689一朝所獨有,好多人歸咎於議會激進派,但明眼人一睇,都知同689有關,有時真係唔明,佢已經搞到香港一塌糊塗,點解仍然要爭取連任?

拉布係非常手段,阻礙議會正常審議工作,本身屬搗亂性質,議員唔可能大小事情凡不合己意就拉布,因為若一條友唔拉得好耐,要其他人參與,大家就會睇民情輿論,如果不得民心,自然冇人會幫手拉布。香港政制先天上太多bug,成個制度設計千瘡百孔,大多權宜之計,於是變成捉蟲。

廣告

當年九七前籌委會班「港奸」為中共出謀獻策,想用盡方法削弱民主黨政治影響力,翻箱倒櫃找出一個叫比例代表名單制,人算不如天算,雖然民主黨直接受打擊,但此制度更有利少數激進派,二、三萬票就穩袋一席,變成人力社民連激進一翼牽制整個泛民。民主黨本是議會溫和派,但因支聯會問題被中聯辦視為眼中釘,溫和路線被激進派取代,是中共一手造成。

另一議會激進化是梁振英因素,好多人認為佢衰係因為「左」,其實這是誤會,佢最大死穴是又要奸但又無能,有賊心而冇賊膽,一上場政府民望暴跌,但仍好作口舌之爭,口出誑言,令溫和中間人士都頂唔順,支持政府只剩下基本盤,三成幾四成左右。特首扮強人但實際處於弱勢,議會內的激進行動失去了社會民意制衡。香港主流民意係相對保守,唔想議員成日拉布,但一諗起689就一肚火,於是就會容忍硂姑息拉布行動。再加上「鄭子誠現象」,拉布行為更進佔道德高地。

廣告

「鄭子誠現象」緣於幾年前高登網民認為任何劇集,有鄭子誠出現,就一定有陰謀,無論他扮演甚麼角色,都是奸人。689就是鄭子誠,任何政策、法案及特發事件,佢一伸隻手落去,公眾就認定背後一定有陰謀。迷你倉大火消防殉職,大家就估689有冇為老友業主陳啟宗保住淘大工廈而迫令消防人員進攻式滅火,廉政專員白韞六忽然取消執行處首長李寶蘭署任引至佢劈炮,大家就認為一定同李寶蘭調查689收受UGL五千萬案有關。至於醫務委員會改革,就一定打算趁機討好共產黨,為輸入內地醫生開綠燈。正由於公眾認為689乃大奸人,任何衝住689而來的拉布、阻撓審議的激烈行動,都會取得正當性。

689愛挑機好鬥,「迎難而上」,拒絕妥協及調動議程,目的為製造「攬炒」後果,借此攻擊泛民。但由於佢民望太低,泛民根本就唔受影響,最後受苦其實係主事政策局官員。今次拉布拉散醫委會條例就清楚,若果在曾蔭權年代,泛民一旦支持法例,係會願意幫政府頂。但689得罪人多且欠缺政治領導能力,好鬥而欠自知之明,於是就放軟手腳。

香港在689之下,已不可管治,可笑是梁粉仍癡人說夢,指689有能力鎮住亂局,所以9月立法會改選後定必能夠連任。一切亂局,其實源自佢本人,唔通北京官員睇唔到?

刊於蘋果日報

發表意見