立場新聞 Stand News

搵「本土派代表」傾係冇用㗎

2018/11/30 — 12:18

//所以選後就有人話明明都搵左黃之鋒佢地去盡力拉票架啦,點解後生仔都唔出來投票呢﹖//

//所以選後就有人話明明都搵左黃之鋒佢地去盡力拉票架啦,點解後生仔都唔出來投票呢﹖//

有班人仍然係諗住「只要搵到年青人去拉票,就拉到年青人票㗎啦;只要搵一兩個本土派人物去拉票,就會拉到本土票㗎喇!」所以選後就有人話明明都搵左黃之鋒佢哋去盡力拉票㗎啦,點解後生仔都唔出來投票呢?一係就話如果黃埔西鄺議員肯落力幫手就唔會咁諸如此類。

以上諗法明顯同現實有好大落差。佢哋仍然唔明白,後生仔唔係好似一般泛民支持者咁,邊個代表人物出來話大家一齊投邊個就會一齊投。本土派分得好散,的確係一盤散沙,係有好多政治 KOL,但冇一個 KOL 可以概括得哂呢班人,毓民同陳雲都唔得,佢哋自己都分咗家而且影響力愈來愈細。而更重要嘅係,本土派 KOL 充其量只係本土派選民嘅「傳聲筒」,而唔係「領軍者」。你可以透過部份本土派 KOL 去理解本土派的想法,但唔好諗住叫班 KOL 幫你改變本土派嘅想法。呢班 KOL 只係因為較掌握本土派民情而成為 KOL,代本土派講出心聲,但如果佢哋無緣無故「泛民化」,就會立即喪失 KOL 的地位。即係退一萬步來講,就算你唔知點樣收買到盧斯達同仇思達來幫李卓人站台都好(咁佢哋兩個絕對唔可能咁做啦),下場只會係雙達站台後就被本土派群眾屌死,而唔係李卓人多咗堆本土票㗎。

所以唔駛再諗住搵邊個「本土派代表」傾,冇用㗎。一兩個人物站台講兩三句廉價拉票說話,亦都一早冇用。如果要爭取本土派民心,你只能夠從主張上、理念上、行為上改變去爭取。即係你一日唔正視本土派重視的議題,兩派人就一日都唔會有改善的空間。咁當然,更簡單的做法就係:「屌!你班本土派咁麻煩㗎!咁一於繼續屌票算啦!」XD

廣告

 

(原刊作者 facebook,標題為編輯所擬)

廣告

發表意見