立場新聞 Stand News

收數佬

2016/5/24 — 13:34

作者多次參與「反圍標」行動。(圖片來源:林卓廷 facebook)

作者多次參與「反圍標」行動。(圖片來源:林卓廷 facebook)

上周五下著雨,我和反圍標大聯盟的成員,在其士物管門外,靜候大圍富嘉花園業主朋友,他們一到,我們近二十人聯同記者朋友,立即衝入大堂,搭「」上樓,留下一名成員慢慢和保安「登記」。

走入其士接待處居然空無一人,我拿拿聲叫成員在「其士」金碧輝煌的招牌旁邊,貼上「其士還錢」的橫額和標語。

「先生,呢度唔貼得嘢㗎喎﹗」女職員面色發紫。

廣告

「你同老頂講,今次爆大鑊,叫佢即刻出嚟搞掂佢啦!」六尺四回。

「林生,我哋有會議室,不如入去慢慢傾。」其士高層現身。

廣告

「慢慢傾?今年一月富嘉花園業主大會已經合法程序,通過決議,要求其士將儲備金交還法團保管,你們一拖再拖,唔好講咁多,幾時還錢?成千萬喎﹗」六尺四開波。

「我哋預咗交番出嚟,不過要等民政處調解……」高層死頂。

「調你個頭,合法決議你唔跟,喺度打死狗講價?民政處同你簽約㗎?根本唔關事!」六尺四先回一板。

「林生,你知啦,有業主聯署要求推翻決議嘛……」高層再死頂。

「有人聯署就唔使跟已經通過的合法決議,咁不斷搵人聯署,你咪攞住筆錢直到永遠?」六尺四反抽。

「我哋張票喺律師度,唔喺我地度……」高層開始頂唔順。

「你律師行喺深圳㗎?叫佢即刻送過嚟還錢啦﹗十五分鐘內無合理回應,我們會將行動升級﹗﹗﹗(出現回音)」六尺四警告。

十五分鐘後

「我地會搵日將張票攞落去富嘉,公開交還。」高層又想拖。

「宜家法團主席、傳媒朋友在場,咁仲唔夠公開,唔好講咁多,即刻還錢!否則行動升級﹗﹗﹗(再次出現回音)」六尺四步步進逼。

「等……等……我即刻叫律師嚟,兩點三交收。」高層拆唔掂,最終頂唔順,先交出817萬元支票,餘款之後核完數我再幫小業主追過。

步出其士,我覺得,幫小業主收數呢行,絕對有得做。
 

原刊於 am730作者facebook page

發表意見