立場新聞 Stand News

幾個放棄做警察的理由

2019/6/13 — 17:41

筆者認為佔領後投身警隊嘅人可分為四種:

  1. 為份糧/養家
  2. 認為無其他工種可以揀
  3. 為伸張自己眼中的正義
  4. 為咗權力/威水等個人優越感

以下文章希望大家參考下,可以同 1&2 嘅人傾下 or 畀 1&2 嘅人睇下。筆者認為四類人當中,他們算係比較有機會回轉嘅一群。

背景:

廣告
  • 中學 group 有兄弟佔領後投身警隊。
  • 六月九日以嚟佢從來無係金鐘一帶執勤。
  • 佢個人係「反送中」
  • 佢比身邊好多識同唔識嘅人用唔同途徑狙擊辱罵等等
  • 佢見到身邊識嘅唔識嘅同袍受傷好唔開心,亦有憤怒
  • 重點 1:佢仍然會思考自己做緊啲乜,可以做的乜去令身邊嘅人唔好離佢而去
  • 重點 2:佢仍然在意非警察嘅朋友/伴侶

以下係佢問我哋:「我可以點做呀?」嘅回應 —

很感動!你作為警察但都勇敢講自己係反對修訂逃犯條例。喺只講紀律和團體性,不講個人獨特性和自由意志嘅警隊入面工作,你仍然講得出自己反對修訂逃犯條例,好難得。但你必須要承認,當你著起件制服,你就無得中立,更加無反對政府嘅選擇。

你話你有多一重身份,好難做,想我哋明白。我誠實答你。我真係唔會明哂,因為我唔係警察。當日你同我講你想轉行做警察,因為保險令你覺得無朋友,而你又無乜得揀。當刻已經係佔領後警民衝突變成近乎無可避免嘅時期,你仍然有投身警隊嘅決定。我覺得你係諗過度過,真係覺得無路可走,先會咁諗。唔知你仲記唔記得,我當時話:我憑咩介意你做警察,只不過係份工,為份糧,扮工做戲,唔好無咗自己就可以了。

我最開心係你自己講得出「你問我係咪好鐘意做警察? 唔係!」呢一句。

因為起碼你知你份工有你唔鐘意嘅地方。

我無做過警察,我只能夠用我嘅觀察講幾個你唔鐘意做警察嘅原因。

1. 上司命令即使你唔同意,你無得揀,因為你要有絕對嘅服從,要做違心嘅事。

2. 份工令人慢慢停止思考:我覺得呢一刻嘅你仍在思考,否則我唔會浪費時間打千字文同你講。停止思考嘅主因無他 — 警隊係集體負責嘅群體。一個人錯,全隊受罰;一個人嘅榮辱就係全隊嘅榮辱。當你接受呢一個設定,就慢慢喪失咗思考嘅動力同能力。我會諗點解警察要為咗一個可能見都無見過嘅 so called 手足而搞到自己好似去到邊都比人針對?點解警察要為咗棵樹嘅枯枝而 suffer?我諗個原因就係,like it or not,警察呢個群體設定就係咁。

3. 階級觀念:記得你分享過警隊嘅階級觀念好重。呢個「有權就大哂,無權就我受哂」嘅風氣下,你認同呢個風氣,你就同個社會價值觀越嚟越遠。咁身邊嘅人離你而去都係正常,淨低嘅朋友就只有同事。你唔認同個風氣咩?你可能就要受同事排斥、單打甚至無前途。咁去到呢個位就係自己取捨。你問我可以做啲乜,唔係好清楚啦咩?辭職與否,我唔左右你嘅決定。

嗰晚嗰堆長矛我真係唔知係邊個嘅,因為我同你一樣,不在場。我唔盡信任何一個二手資料,但我會諗:你話係就係呀?我絕對唔希望有任何一個人受傷/死,我唔係想拗,亦無排除示威者拎出嚟。我只係想講,只聽新聞/同事講,我都唔信。所以我選擇去現場用自己對眼睇。

你話若果你放棄做警察的話,你會同我哋企出嚟。我好感動!因為你知道係警察嘅身份阻止你上街和平示威,你並非政治冷感,你仍未完全被警察教育同化。

呢個社會每一日都令我哋失去好多寶貴嘅嘢,我唔想失去更多,包括你。

廣告

發表意見