立場新聞 Stand News

政改陰謀論

2015/6/22 — 10:42

資料圖片:缺席表決政改的部份建制派議員

資料圖片:缺席表決政改的部份建制派議員

【文:空氣人(AIRMAN)】

政治就包含左好多計錯數㗎啦,人數可能係其中一樣,建制派議員一早就知道政改點都過唔到㗎啦,呢個係無咩懸念,甚至建制派都未必想過啦。

咁過唔到,又平平淡淡咁,佢地點出位,尤其是係11月有區議會選舉,下年有立法會選舉,為了爭取sound bites,上吓報紙,咁就搞下事囉,佢地應該認為可以學泛民嘅手段,拉下布(之前都有講出口),不過佢地又爭取唔到sound bite喎,咁就不如玩大啲離場啦,咁咪上曬位囉,又可以拖下時間喎。

廣告

佢地估唔到唐營人士(自由黨加林大輝加陳健波),轉數快到,諗到一個可以過梁營建制一棟,又可以爭取sound bite,又唔會得失中共,又能攞選票嘅做法喎,呢啲就計啱數啦。

另外,嫻姐要另開一段黎講,2012年,佢出黎玩番立法會,大家都估到係中共想攞多個位,之後,佢係懷仔單嘢上,點都有同上面(包括政府)去溝通過,點知咁都會柒喎,我相信佢下屆都退休啦,退休前黎單咁嘅嘢,係人都嬲啦,咁佢唔跟大隊好合理喎,都係想過番政府一棟。

廣告

呢8個人都表示事前唔知情,哈,睇片都見到,大家有傾計嘅,比你地講話唔係傾呢樣嘢啦,做左幾多年議員呀,最少都3年啦,泛民走都係咁嘅樣,點會唔知喎,笑大人個口咩,嫻姐隔離個個都走啦,佢點會唔知,唔走就話唔知囉。

成件事都可以睇到計錯數係可以做成政治炸彈嘅,原本可以上位上報紙,我地為左“撐政改,玩拉布,齊離場,導流會“(口號都幫佢地諗埋),依家報紙係上左,但係比人恥笑囉,仲要去中聯辦交代,嗱,我就覺得佢地慘嘅,我祝福佢地下屆仲係呢33人選立法會啦。

 

作者簡介:港語學成員,因此,我會以廣東話入文;IBHK主持,因此,我會評論時事;議員助理,因此,我唔會離地

發表意見