立場新聞 Stand News

整治取代管治

2015/8/3 — 8:33

梁振英(資料圖片)

梁振英(資料圖片)

港大等埋首副風波之厭惡,因為如此粗糙低水平的卡位角力,並非在OL、Sales Team、打工仔辦公室上演的暗戰,而是公然地在最高學府眾目睽睽下打真軍,前大學校長、名醫教授、專業精英、政客們之不顧身份,在政治面前唔要面不知恥行為,令大家震驚,校委盧寵茂教授以受害人身份吐心聲,認為「我深信政治鬥爭是很黑暗,好醜陋,完全不講理,令到人瘋狂。」冇錯,香港人對政治鬥爭之醜陋,也感同身受,梁粉校委千方百計阻止委任陳文敏任副校長,是重新定義了香港公眾人物的道德水平。幸好袁國勇教授仍有羞恥之心,以退出校委會表示恥與之為伍。

「梁粉時代」是泛政治化及鬥爭為綱,既然無能、亦無心於施政,就索性全力搞政治,以此作為爭取中央好感,掃取其他挑戰者,成為唯一候選人。整治港大呢張單,要咁急,做到咁核突,抓爛面,亦與選舉形勢告急有關。後政改時期專注於民生,言猶在耳,立即爆發建制內鬥,整肅傳統愛國局長,炒公務員事務局局長,若非上面有官員把關,今次為了角逐連任推卸施政失敗責任之「重組」行動,豈止曾德成、鄧國威兩人,然後就輪到港大六國大封相登場。香港政治鬥爭之烈,比政改時更甚,因為主動權係握於689手上,按他政治需要而策動。

校委文灼非認為整治港大始於李克強事件後,事實上徐立之係因為孭大鑊而冇得留低,大家唔記得咗當日新校長馬斐森獲聘仍未上任,已被一班「愛國愛港」教授狠批,陳婉瑩指新校長不識中文、不諳國情,盧寵茂就更加出位,直指馬斐森乃「無知、無能、無心之三無校長」,其出言之重,豈是學者所為。當時好多人唔明白,為何名醫口出惡言。今日終於真相大白,一切皆因政治二字。梁智鴻正係見到政治風暴正席捲港大,於是拍板搞個鬼佬做校長,因為佢不諳國情,換句話說即係唔識睇權貴眉頭眼額,自己唔會主動「識做」,搞掂陳文敏,反而只跟規矩辦事。於是整治港大呢張單隨時找唔到,就惟有委任更多梁粉入主大學,包括重炮手唔怕做爛頭卒嘅行會成員李國章,實行鬥到底,不惜攬炒隊冧港大百年聲譽。

廣告

問題係香港人真係冇辦法?任由香港就咁玩完?𠵱家唔可以靠泛民及勇武學生,而係團結所有不認同「政治鬥爭為綱,整治作手段」之人,集體反抗。袁國勇辭校委只係第一步,在港大舊生護校中,不少是建制中人,但他們仍然相信程序公義,呢個保衞港大運動,直接講係保衞香港運動,因為未來半年,各式各樣整治運動將陸續登場,689正以強硬政治姿態來博取中央支持連任,同時嚇退其他挑戰者。

千二人組成之選委會,是以主流建制為主導力量,只要有一個建制溫和力量候選人入閘,689就會陷入苦戰,因為未來半年佢越鬥下去,建制內就越多人反抗,甚至集結成一股對抗力量。政治鬥爭乃不斷找尋敵人,製造敵人的過程,短期而言四方樹敵,的而且確會感到八面威風,但越搞敵人就越多,陷入孤立,越孤立就會越傾向做高風險政治賭博,直至一鋪清袋。

廣告

 

原刊於蘋果日報

發表意見