立場新聞 Stand News

新界又起風雲

2016/1/25 — 7:26

新界鄉議局主席劉業強(鄉議局圖片)

新界鄉議局主席劉業強(鄉議局圖片)

最近新界忽然又成為政治火藥庫,早前新界王劉皇發身體欠佳,就傳出有其他勢力要求他交出鄉議局立法會功能組別議席,發叔挑通眼眉,嗱嗱臨交棒予劉業強,跟手就發生立法會「等埋發叔」蝦碌事件,究竟係假蝦碌定真發圍,大家都睇唔通。冇耐就出現鄉紳醞釀組織新界黨,2016立法會選舉就快到,擺明唔想同民建聯合作,如果真係分道揚鑣,新界西至少有兩席危危乎。同一時間套丁案審結,涉案鄉民被判刑,而上周有新網媒報道劉皇發套丁發達。唔知點解,上述情節似曾相識。

2011年曾蔭權政府任期最後一年,同樣爆發清拆新界僭建問題,本來只是申訴專員批評,政策局大可不理,但奇就奇在發展局忽然勇武,要一視同仁處理新界僭建,贏盡掌聲。而僭建更無端成為衡量政治人物道德的最高標準,689就是利用僭建打敗大熱唐英年,唐原本挑選的政務司司長林瑞麟離開政府,而政務司司長一職就落在時任發展局局長,也曾向傳媒表示會退休的林鄭月娥手上。之後一切大家都見到了,不單止清拆新界僭建不了了之,更推倒原本訂下新界東北「官地收回」模式,政府一年之間又變回新界既得利益保衞者。僭建問題一度夾到劉皇發無氣唞,因為佢一路同政府有偈傾,但政府忽然揮刀劈向自己政治盟友,他變了兩邊不是人。

?家忽現又爆套丁問題,新界鄉紳相信一定會趁機發難,指摘建制派無法維護新界利益,提出組黨訴求及夾擊鄉議局,同幾年前新界僭建問題一模一樣,令人懷疑是否一直有政治力量希望改組新界利益集團,清除傳統鄉議局勢力,扶植另一班更聽話、政治上更靠得住的代理人?而政府就配合出手用政策去搞。

廣告

但在發叔交棒後,係唔會咁容易俾新界社團聯會及民建聯取代鄉議局,而呢場角力已在區議會選舉見端倪,立法會就更白熱化。問題是挑撥新界內訌,只會製造兩敗俱傷的殘局,新西梁志祥、陳恆鑌連任有危機,而鄉紳未必贏到兩個位,甚至可能雙方均高票落選。如果在今年立法會選舉中建制派大敗,689就要孭大鑊了。因為佢在區議會已經衰一鑊,佔領運動後仍沉迷政治鬥爭搞大學生、批《學苑》、介入港大副校長遴選,令社會分裂擴大,間接幫傘兵助選。

林鄭當年憑搞僭建上位,會否故技重施,再一次借打新界佬對付套丁上位,不得而知。雖然她早前在《文匯》、《大公》訪問中表示會退休,不會留下,但當年她一樣向《蘋果日報》表示退休,結果咪又係成功當上政務司司長。政客訪問不能作準,一日大局未定,一日都有可能打倒昨日的我。如果真係官到無求,就應該站在民意一邊,點會為全民退保高調砌自己朋友周永新教授,得罪社福界,砌泛民鉛水事件,撤回網絡廿三條又用彈弓手,如果真係官到無求,又何來咁多政治計算呢?

廣告

刊於蘋果日報

發表意見