立場新聞 Stand News

【新界東補選】本土派、雨傘黨 應出選湯家驊空缺

2015/6/22 — 19:27

呢個年代,一係唔好寫,寫乜都有機會得罪人。湯家驊辭職,之後嘅補選將會引發一啲泛民 / 本土派及相關嘅討論同爭拗。我只係覺得有幾點幾重要:

1. 任何立法會選員嘅空缺,係【空缺】嚟嫁。

乜嘢係【空缺】呀?即係唔屬於任何人、唔屬於任何政黨囉,大家可以出嚟公平公開公正咁選同爭。

廣告

如果之前邊個黨嘅人選到就要畀返佢個黨做,咁唔使補選啦?2000年嗰陣程介南退選(佢係選到嫁!),咁嗰陣鍾樹根接咪得,使鬼出搞補選咩。五區公投又所謂何事?

2. 分組點票

廣告

現時直選議員,泛民(包括湯家驊)同建制嘅數目為18:17,若然無咗湯家驊嗰一票,去咗建制口袋,咁泛民嘅大多數就冇咗,喪失咗「分組點票」下地區直選的過半數......

嘩,好慘呀!!!

問題係喺「分組點票」下,泛民永遠唔可以喺功能組別拎到過半數嘅票。我記憶中,呢屆立法會從來未試過有個人議案/法案修訂過到「分組點票」。所以喺分組點票下,呢個「直選半數」根本係多餘魚,除非建制無端端要整個以特權法查泛民啲人啦。唔好誇大呢個議席嘅重要性啦。

3. 任期

呢屆(2012年)立法會選舉嘅任期,只係去到2016年9月30日。以2000年程介南同2010五區公投補選所需嘅時間計(由辭職到補選,分別為三個月同四個月),湯家驊今年10月1日辭職,最快下年1月先投到票,距離立法會開會開到7月,任期得六個月。

唉,串啲講句,六個月做得啲乜?莫講六個月啦,你睇下班建制派做咗十八年,全部一碌木咁,連流會要夠 / 唔夠 quorum都唔識數。六個月,嘥氣啦,學完議事規則都收皮啦。

呢席,輸咪輸囉。拎個位出嚟,本土派 / 雨傘黨仲有泛民爭下,睇下邊個有食力囉。

--

所以,對我嚟講,本土派 / 雨傘黨 應唔應該出嚟選,係多餘嘅問題:選就一定選,淨返落嚟嘅問題只係諗點派 / 派邊個、同泛民係初選完再出嚟選定係直接出嚟選。

與其遲啲喺度又抺黑又爭拗,不如早啲諗點協調/協唔協調啦。你無中聯辦喺度一錠定音,有啲嘢一定要自己圍內傾。

至於本土派 / 雨傘黨,有興趣嘅嗱嗱臨好插旗咧。一陣畀人睇死你哋一盤散沙,無凝聚力,講就兇狠、做就碌撚,諸如此類,就唔好啦。又或者呢頭屌完人哋霸住啲議席,一般又葡萄人哋逗十幾雞一個月,總之而家個議席係空缺嚟,想選就嚟啦。

最後,利益申報:家住九西,無得投;如果有票,視乎邊個代表本土派 / 雨傘黨出嚟選囉。

如果本土派 / 雨傘黨根本無人,求其搵個阿茂,無背景無盛,話佢係本土派,搵阿水投你咩-而家唔係圍內打飛機,而係尋求廣大市民嘅支持呀。

(嗱,我心裏面就有一兩個人選咧,有名氣、有往績,夠食力代表本土派 / 雨傘黨。唔使問,我唔會開名。佢肯出嚟選,我個人拎港幣一皮出嚟畀佢做選舉經費。)

 

標題為編輯所擬;原刊於作者 facebook

發表意見