立場新聞 Stand News

施永青你嗰代人真係好tough

2017/11/24 — 9:50

施永青(無綫新聞片段截圖)

施永青(無綫新聞片段截圖)

有啲涼薄嘢,我個人取向,就係唔鍾意講,你話咩口德邨咩扮嘢,你有你講,唔關我事。不過有時聽到啲權貴講啲冇乜血性嘅柒嘢,就唔使避忌。

例如,施永青聽到今時今日七個學童一個抑鬱,就要撰文批判,話今日啲學童,一蟹不如一蟹,唔捱得。然後又話,他讀書時香港教育制度比今天更不合理,並「由此可見」,現時的學生之所以會出現精神問題,並非社會給他們的壓力大了,而是社會令他們對現實世界有幻想,以為這個世界實在太完美了,以至他一接觸真實的世界時,就處處感到失望,精神不斷地受挫折,感到十分沒趣。

嘩,施生你嗰代人,真係好tough,好捱得,係一代好「蟹」。不過咁,咁啱呢,呢兩日恒指升上三萬點,我就諗起一啲嘢,九七之後,好多人負資產啊,好多人有精神病啊,仲有好多人燒炭自殺啊,連黃子華都在2003年搞咗個《冇炭用》嘅棟篤笑。係囉,大家好似唔記得咗,當時呢一代負資產燒炭「冇L用」(用施生標準)嘅上代好蟹,喺股市先成為咗一隻大蟹,再喺樓市成為一隻巨蟹,呢一代人係咩人呀?係咪今日嘅八九十後呀?係咪我呢代人呀(我嗰時讀緊大學咋),唔係,咪就係施生上下十年年紀嗰班人囉。

廣告

做乜呢班人咁冇用?唔係社會給他們壓力太大,唔係股災和樓災給他們的壓力太大,唔係董生嘅八萬五給他們壓力太大,係社會、股市、樓市、回歸和董生令他們對現實世界有幻想,以為這個世界實在太完美了,世界是沒有股災、樓災和管治災難嘅,當佢哋一接觸真實世界時,就處處感到失望,精神不斷地受挫折,感到十分沒趣,不斷哀求政府打救佢哋呢啲負資產,有啲仲走咗去自尋短見添。

呀,我都唔記得咗,不斷令香港人以為樓股世界好完美,仲包括咗不斷唱好嘅地產業施生。

廣告

嗱,唔怕話你聽,十年前,我抽中咗阿里爸爸賺咗成皮嘢,攞咗大半請屋企人食海鮮,之後我梗係唔再抽啦,唔通抽新股真係會發達咩,隻隻股都會爆升咩?但係我啲朋友,成日問我有冇抽新股,我就話冇抽,啲朋友就係咁問恒指三萬點做咩唔抽?(好彩嗰時冇whatsapp,唔係煩都煩死。)我呢啲朋友,投資記錄係輸過幾十萬,但就未聽佢贏返呢幾十萬,學歷不高又不懂財經。即係有人話,「牛頭角師奶」都叫你買股票,個個中咗「Number降」,你就知股災就嚟來。

係呀,我呢啲朋友,近日又問我有冇抽新股,我連閱文IPO都唔知,抽條毛咩?但見到呢個勢,加上好多人開始話「依家兼職炒吓股感覺好似半退休生活」,我就會更加努力工作儲cash,因為我知道好快,佢哋一係要加倍努力工作,一係想努力工作嘅機會都冇。

恒指一定會再創新高,快啲入市啦,因為去到呢個咁亢奮嘅時刻,冇人㩒得住架啦,一定會更高,更高,更高。但我必須提醒施生嗰類人,出年有咩依郁,唔好做廢佬,要做一隻巨蟹,要挺起來,撐起隻鉗,批判年輕人同小學生:「你睇吓我幾勁!」

發表意見