人在中環 - CK

人在中環 - CK

我係一隻又笨又固執嘅豺狼。著有《人在中年》。

2019/9/26 - 11:24

早年移居外地港人個心點解咁藍?

TVB將軍澳電視城入口的TV Buddy。

TVB將軍澳電視城入口的TV Buddy。

有些香港嘅朋友,好感慨點解有咁多早年移居外地,揸住外國護照,正享受住外國民主自由嘅港人,個心會咁「藍」。覺得佢地係咪已經出賣咗良心。

唔係想幫佢哋講說話,不過我的確唔認為係佢地良心有問題,反而係,佢哋吸收資訊嘅途徑出咗問題。

港人移民,特別係上一代嘅移民有一個普遍問題,就係唔係太懂得融入當地西方社會。佢哋嘅生活習慣,依然係「盡量」港式,社交嘅圈子,亦會「盡量」香港化。讀嘅係中文報紙,睇嘅…係 TVB。當香港人已經越嚟越唔睇電視,更加越嚟越唔睇 TVB 嘅時候,你會發覺 TVB 在外地華人家庭嘅滲透率高得驚人。正版翻版嘅 TVB 電視盒,個個家庭都有,而且日日都睇。

廣告

香港人唔睇大台,尚有極多渠道接收社會資訊。但人在外國,這些電視盒,變成好多華人家庭用以緊貼香港嘅主要渠道。香港人唔睇 TVB,知道 TVB 新聞有伏,可能極其量係近五至十年嘅事。然而上一個移民潮,係九十年代。那個時候大家仍然係睇極多大台。香港移民喺嗰個時候離開香港,吸收資訊嘅習慣亦定格喺嗰一個年代。慣性收視喺香港已經逐漸被打破嘅時候,在外地嘅港人社區,大台收視卻穩如泰山。港人移民日復日,年復年地接收單一資訊,視角和價值觀當然會被影響。要知道,唔習慣融入主流社會嘅移民們,係連當地主流新聞都很少看的。

*後補多幾句:
大家係由幾時起,同因為咩原因開始發覺大台新聞有伏?人在香港,對本地發生嘅事情,其實有眼睇,亦有感受。當發現大台新聞所呈現嘅社會狀態,與自己親身感受同親眼見到嘅並不一樣嘅時候,你就自然會醒覺,會明白大台有伏。但移居外地嘅人,卻唔會有我地呢個體會,佢地無法親眼見證,無法親身感受。要有我地本地人嘅感悟,係有難度嘅。

移民係雙刃劍,有人因為去到外國生活而擴闊視野,但同時亦有唔少人因為移民到外國,生活圈子被困在小圈子當中而變得視野更加收窄…講到尾都係睇性格同彩數。

作者 Facebook