立場新聞 Stand News

是誰洩露有關橫洲發展的政府內部文件?

2016/9/20 — 20:45

橫洲綠化帶發展關注組橫額(TVB新聞截圖)

橫洲綠化帶發展關注組橫額(TVB新聞截圖)

【文:財奴】

特首梁振英最近認真唔得閒,自朱凱迪當選立法會議員後,橫洲發展即成為全城焦點,「官商鄉黑」呢四隻字不停喺傳媒出現。梁特首原本只係推兩個局長去接朱凱迪嘅招,後來蘋果日報取得政府內部文件顯示佢有份參與其中,佢又連夜發聲明試圖解釋,被一個仍未正式上任嘅議會新丁玩到氹氹轉,可以講係後欄著火,狼狽不堪。

究竟係邊個將呢份引爆政治炸彈嘅內部文件交到傳媒手中?中秋剛過,筆者有啲意猶未盡,不如同大家猜下燈謎。

廣告

係人都知無論建制定泛民,都大把人唔妥梁振英,所以有嫌疑嘅人都唔少。近日成報大肆攻擊梁振英同中聯辦,坊間盛傳係習派試圖喺香港從由中聯辦控制嘅大公文匯取回話語權嘅一個舉動。不過既然洩密嘅係蘋果日報呢份中共視為眼中釘嘅報紙,洩密者來自北方嘅機會不大。

其實,份文件係來自政府內部,洩密者好大機會係公務員。有咩人願意冒性命危險將呢份文件交到記者手上呢?佢背後又有乜動機?

廣告

我哋或者可以從特首跑馬仔嘅遊戲入手。於目前最有機會挑戰梁振英成為下屆特首嘅,係雙曾一林,佢哋當中邊個有較多公務員朋友,而同時又同與蘋果日報極為友好嘅泛民最多偈傾?答案真係呼之欲出。

發表意見