立場新聞 Stand News

時昌大火算林鄭舊賬

2016/6/27 — 7:25

政務司司長林鄭月娥(資料圖片)

政務司司長林鄭月娥(資料圖片)

「我亦會在今年的測量師學會周年晚宴買一張枱,招待基層同學們出席,讓他們增廣見聞」,梁振英周六在FB公佈。如此「鷄毛鴨蒜」也不忘向公眾宣傳,可想而知689心中只有競選,也難怪周五凌晨也要去聯合醫院打搞累極的受傷消防員。

香港當前最刻不容緩工作,並不是向年輕人宣傳祖國好香港好,一帶一路前景多麼輝煌燦爛,又或者免費招待12位基層同學去測量師學會晚宴!而是遍佈全港工廈的計時炸彈:劏房迷你倉消防安全問題,以兩位消防員性命換來的教訓,唔通救熄火就忘記得一乾二淨。作為行政政官,理應責成發展局局長陳茂波呢位「自己人」,在指定時間內完成巡查及提交監管建議,因為隨時可能再有迷你倉火災,係咪應該盡快堵塞現時冇王管的漏洞?

縱容工廈劏成過百間鐵皮屋,乃林鄭月娥當年出任發展局局長時的傑作,她提出所謂活化工廈政策,比發展商刮盡工業地之潛在價值,美其名係活化,保育,實際得益者乃大地主硂財閥及發展商,時昌迷你倉所在淘大工業村便由恒隆陳啟宗持有。活化政策容許整幢工廈改變用途,當然唔會益到普羅市民,只會益地產佬、舖王、的士小巴大王、炒家落釘,普通人何來幾億去投資,而改建後,工廈變成貴價寫字樓、酒店、自由行商場,租金上升,連帶旁邊工廈租金也上漲,變相趕走原本在工廈掙扎求存的創業年輕人、studio、band房。

廣告

牛頭角工廠區Live音樂演出場地Hidden Agenda,是喜歡搖滾及live music年輕人聚腳地,最近頻頻畀地政署發信警告,要巡查改變用途,最後好大可能逼業主唔再租。在官僚眼中一間Live House都唔可以容忍,但偏偏大財團將工廈劏成迷你倉,唔使防火設施,冇王管之餘仲賺取暴利,你話年輕人點會唔反政府。上任發展局好大喜功,以「起動九龍東」來包裝,一時又話去巴黎新開發區Le Defense考察單軌車,一時又話要成為九龍新CBD,概念就吹到天下無敵,幾年下來,除咗迷你倉遍佈、租金上升、多咗幾間自由行酒店、逼走文青創意人之外,九龍東真係唔知邊一忽似CBD。

林鄭月娥所謂好打得,係專打普羅大眾,但對住權貴、財團、土豪,就好乖好聽話。她任內代表作除活化工廈、起動九龍東、仲有大家唔多記得清拆新界僭建,擺出一副不畏強權姿態,當時贏盡民意,但隨着時間過去,冇人再提,究竟屋宇署至今發出多少張清拆令,在新界清拆過多少個未經批准的建築物?清理新界僭建物政策由始至終根本冇執行過!至於新界東北社運人士、農青及馬寶寶農場等人,就更加要感謝林鄭,本來上屆政府訂下以官地收回方式開發東北,即發展商早早落釘收購的農地,也不能自行發展,要先由政府收回,以杜絕官商勾結指控。當林鄭過渡至689政府,當上第二把手後,官地收回模式忽然變成公私合營,容許發展商可自行發展。

廣告

大部份香港人,是善忘的,難怪被指為港豬。

 

刊於蘋果日報

 

 

發表意見