立場新聞 Stand News

「曾經,我距離依個夢想,只有一步之遙。」

2016/8/6 — 14:47

梁天琦(朝雲攝)

梁天琦(朝雲攝)

【文:朝雲】

5/8 添馬公園(四)梁天琦演說

「曾經,我距離依個夢想,只有一步之遙。」

廣告

***

(咪沒有聲)做人真係一波三折。。。

廣告

我係本土民主前線發言人,我叫做梁天琦。

好高興大家出席和理非非嘅集會。好多人或者奇怪,香港民族黨或者本土派,會搞個咁嘅集會。

過去我地成日強調要勇武抗爭,唾棄形式主義,失敗主義。但係咪代表我地一定唔可以喊口號,唔可以搞遊行,唔可以搞集會,唔可以聽歌?其實從來唔係。

我地過往係金鐘,係旺角,係雨傘革命走上前線,點解我地唾棄舊有模式,唾棄舊有政客?就係因為佢地教條主義。

和平、理性、非暴力、有啲人仲覺得應該非粗口,佢地覺得呢啲嘢係天條,一定唔可以違背。結果當金鐘呢個地方,有義士衝出龍和道,結果就俾一班教條主義嘅示威者拋棄。

我地係反對呢種教條主義,而唔係和平集會,或者公民抗命本身嘅能力。係新東補選嘅時候我已經講過一次。

我地依個社會,要攞番應有嘅權力,唔可以繼續教條主義,條條大路通羅馬,邊個方式可以推翻政府,邊個方式就應該去做。

相信和平抗爭嘅人、相信公民抗命嘅人,繼續公民抗命;相信佔馬路、相信絕食、相信罷交稅等等和平手段,繼續去做。我鼓勵你地去做,我希望你地去做。我唔希望因為有人批評你地嘅手段,結果就完全放棄你地相信嘅嘢。

同時間,相信勇武抗爭嘅人,一樣要繼續做。近呢幾個月,我地係七一曾經發起過示威,係中聯辦外邊,我地失敗左。我地連累好幾位義士,出到嚟諗住支持我地,但結果被捕,乜嘢都做唔到。Plan A 做唔成,Plan B 做唔成。Plan C 都做唔成,證明左乜嘢?

我地反抗政府,攞番應有權力嘅時候,要因時制宜。當晚,有近千個警察守係西環,如果我地盲目相信勇武抗爭係一定得會成功,只有勇武抗爭係一定要行嘅路的話,我地當晚就會一齊去送死。我唔想見到有人犧牲,唔想有人被推上前線。

只係一個必須嘅情況底下,只係一個兩難嘅局面,一係就留低;一係就企係度抵抗嘅時候,我地先要孤注一擲,勇武抗爭。我希望大家明白依一點,唔好再繼續教條主義,唔好再盲目相信自己嗰一條道路,係一定會成功,係必須要行嘅路。其他所有嘅路都唔應該行,係錯嘅。我地絕對要因時制宜。

所以我覺得,今日民族黨搞依個集會係非常之好嘅一件事。因為我相信。。。而家依四隻字我唔講得(指著佈景板的「香港獨立」)。。。因為要打官司要選舉呈請,所以唔講得,好鬼辛苦,真係好辛苦。

依四隻字係第一次係添馬公園依度出現,然之後有咁多香港人走出嚟,就係為左呢四隻大字。依個係一個歷史時刻,我唔會叫你地俾啲掌聲自己,絕對唔會。但係要記住依一刻,依刻係我地彰顯獨立意志嘅一刻。

***

好,跟住入正題。我呢段時間思緒好混亂,因為兩個禮拜發生太多事,乜嘢都未開始準備,我仲返緊學,結果政治嘅漩渦係咁「拑」埋嚟,要不斷面對。所以到而家依刻,我個頭腦非常混亂,到底要講啲乜嘢,先最能夠鼓動大家獨立嘅意志;到底要講啲乜嘢,先最能夠令更加多人醒覺,走出嚟反抗。都仲未諗好。

但有幾個主題想講,寫左係手板。第一樣嘢係政治。

乜嘢係政治呢?有人話係眾人之事,而我睇政治嘅本質,其實就係權力嘅分配。當我地講一個政治問題出現嘅時候,其實就係講緊依個社會上嘅權力、資源到底係俾中央繼續集權,或者係俾社會上嘅權貴,繼續保持佢地權力,抑或呢啲權力轉移到另一個持份者,例如人民,例如香港人。

依兩個禮拜發生嘅事係啲乜嘢,就係政府將佢地本身法例上冇嘅權力,延伸,無限延伸。白紙黑字寫明嘅法律,政府唔跟。政府延伸佢地嘅權力,剝奪人民本身應有嘅選舉權、被選舉權及言論自由。所以依個係一個權力分配嘅問題。

當我地依班香港人走出嚟反抗,追求一個政體嘅改革,或者好似今時今日咁樣,追求依四隻大字。我地講緊嘅就係我地要奪權,我地要攞番社會上我地應有嘅權利。

依一個香港嘅主權,唔係屬於習近平,唔係屬於中央,唔係屬於共產黨,唔係屬於中國政府,亦唔係屬於特區政府。依一個社會嘅主權係屬於香港人。主權永遠都應該在民,唔應該在於北京。

但香港嘅情況係點樣?百多萬嘅香港人,有血有肉嘅香港人,一百幾十萬,佢地冇選出佢地代議士嘅權力,冇被選舉權,冇言論自由,佢地嘅權利完全俾政府剝削。呢一個係乜嘢社會?係一個獨裁社會。有獨立意志嘅人,追求意志嘅人,面對一個獨裁政府,應該點樣?

革命。但係問題就嚟喇,革命會流血嗰喎、革命會失敗嗰喎、革命有犧牲嗰喎。當然會出現喇。如果依個政府唔令你革命失敗、唔打壓你嘅革命、唔令你有犧牲、唔剝削你權力、唔扼殺你地係萌芽之中,代表啲乜嘢?代表你地嘅革命冇效囉,你對政府冇威脅囉。

所以今時今日依個局面,好似好差,但同時間都反映一樣嘢,就係我地對香港政府以及北京政府、我地對佢地構成威脅。所以我地應該為依件事出現而鼓舞,我地丟掉左對香港特區政府、對基本法、對一國兩制嘅幻想。我地今時今日呢刻開始,我地準備鬥爭,準備奪權,依個就係今日集會嘅意義。

***

跟住另一樣嘢,政府。乜嘢係政府?政府點解會出現?政府係因為人民希望有一個權力分配嘅機構,會維持社會嘅秩序,先至會出現。政府唔係一個管治人民嘅機構,政府應該係人民嘅僕人。

人民唔應該害怕政府;政府應該害怕人民。相信大家有睇戲,應該知道依兩句說話,係香港一樣適用。雖然今時今刻,仍然有好多香港人害怕呢個政府,點解?政府有武力、政府有權力、政府掌握哂社會上嘅話語權、政府有法律,可以隨意咁解釋法律。袁國強講嘅法律就係法律,依個就係香港,政府嘅本質就係暴力機構。

當我地做嘅事,唔符合政府當權者嘅方向,佢就會用暴力嚟打壓我地。所以點解我地要強調勇武抗爭,就係因為政府本身已經係一個暴力機構。對付一個暴力機構,我地唔可以仁慈,唔可以懦弱,亦都唔可以再同佢講乜嘢仁義道德。

依一個政府,根本就係一個無賴嘅政權,中國就係一個無賴嘅國家,你同佢講仁義道德做乜鬼嘢。佢要做無賴嘅。。。當然有好多人唔想做無賴,包括我自己。但如果依一個係必要嘅方法,去推翻依個政府嘅話,我願意做依個無賴。

***

跟住落嚟第三樣,革命。

乜嘢係革命?大家一定即刻聯想到流血革命、辛亥革命、死人、冧樓、犧牲、打壓、監獄。。。大家一定聯想起依一切一切。

但其實革命本身係一樣乜嘢事呢?革命本身就係講緊一個社會結構,權力分配,出現根本性改變,一個從下而上嘅改變。一個從上而下嘅改變,其實係代表一個改革;而一個從下而上嘅改變就係革命。

大家諗吓,今時今日你地,仲會唔會奢求中國、香港特區政府從上而下改革?仲會唔會相信佢地俾我地民主?俾我地自由?冇可能。所以話我地必須要革命,而革命幾時開始?革命其實已經開始。

兩年前點解我地依班本土派,叫雨傘運動做雨傘革命?就係因為我地知道,嗰一刻就係一個開始,嗰一刻有更多香港人知道,唔可以再靠其他人,我唔以再依靠個政府網開一面。因為如果你依靠佢網開一面,先俾我地有民主,呢一種只不過係一種人治。

點解我地要當權者網開一面呢?點解我地要北京政府有一絲善念,知道香港人其實唔係諗住顛覆國家架,只不過想要權利咋嘛,只不過想要民主咋嘛,而開啟民主改革?

我地就係唔相信依樣嘢。926、928、1130,我地先至會走出嚟,從下而上向政府施壓。我地唔希望香港係一個人治社會,我地希望香港係一個法治社會,憲法寫到明我地應有嘅權利,我地就應該要有。

所以兩年前依一個革命已經開始左,只不過大家唔知道,只不過大家仍然覺得,唔係呀,好和平,好理性,好非暴力,非常之美好嘅一個烏托邦,好似金鐘嗰一條馬路,夏愨道咁樣。

但其實革命已經悄悄開始左。因為我地已經唔再奢求當權者從上而下改革,我地係由下而上扭轉依個社會嘅權力結構。

革命已經開始,咁究竟幾時會成功。1894 年,孫中山做緊啲乜嘢野?佢仲係度向李鴻章上一本書,叫萬言書,仲講緊一個滿清政府應該點樣改革。相信大家都知道,1895 年,冇人理佢之後,成立左興中會,開始正式革命。幾時先成功?1911 年。由佢開始走上革命呢條路,用左 16 年先至推翻到滿清政府。

我唔想掃大家興,唔想潑大家冷水,但係革命係一條長嘅路,冇可能一時三刻就成功,但係又有可能突然一時三刻就成功。革命係一個好弔詭,好好笑嘅一件事。但係我地要保持一個革命精神,我地要影響更加多嘅人。因為當成功嘅嗰一刻,我地回望番過去,就知道一切都係值得。

如果革命成功,我地攞唔到人民嘅心,我地冇辦法得依個天下。得民心者得天下,所以我地最先要做嘅嘢,係影響更加多嘅人。

今時今日,有 17%,百多萬嘅香港人,相信依四隻大字(香港獨立),我地要將依個數字繼續上升。我唔知道幾時先至會成為社會上嘅大多數,但我知道終有一日,我地係社會上嘅主流,依一樣係必然發生嘅事。

因為即使今時今日,我冇得參選,冇得再從政,我相信依個門常開一日係依度,我都冇機會走入隔離依幢大樓。但唔緊要,因為仍然有第二個取代我,後繼一定會有人。你地絕對唔應該將所有希望,擺係一個人身上。一個人當然代表佢自己,但同時間佢代表嘅只不過係一個理念。你地追隨嘅應該係一個理念,唔係一個人。

即使我冇辦法參選,冇辦法再。。。我唔知仲可以做啲乜嘢。但係我知道,我仍然可以繼續影響更加多嘅人,我仍然可以繼續宣揚我嘅理念。我地要繼續影響民心。我地終有一日會成為主流,終有一日會成功。

***

到最後,夢想。

乜嘢係夢想?夢想係。。。就係夢想囉。

夢想其實係好虛幻一件事。夢想係實現之前,永遠都好似痴人說夢話咁樣。

我係 17 歲嘅時候,就係 2008 年。。。有好多記者係度,我唔講政黨同議員個名。但當時 08年,大家都知道有邊一個新政團走入立法會。大家都應該知道,當時有邊一個領頭人物,係依個政黨代表。佢地係議會做嘅所有嘢影響到我。

我中六嘅時候就同我一個同學講,我將來想成為一個代議士,你覺得點睇。佢就話,幾好呀,你都幾啱做呀,你一定會成功,我將來會投票俾你。今時今日好似失敗左,但曾經,我距離依個夢想,只有一步之遙。

係我追求依個夢想依一年,發生左啲乜嘢事?其實係一年前,我只不過係一個廢青,一年前我只不過係畢業唔到嘅大學生,好想畢業,畢業唔到。一年前我只不過係一個社會上完全冇人識我係乜嘅人,我亦都唔知道,係社會上應擔當乜嘢角色嘅廢青。

有邊一個人會諗到,一年之後,依一個廢青會成為一個被政府剝奪政治權利嘅香港人;有邊一個人會諗到,一年之後,依一個廢青曾經距離依個夢想,只有一步之遙?

冇人會諗到。

我自己都唔係好相信。但即使我對自己嘅夢想能唔能實現,只不過半信半疑。但係我知道,如果我真係繼續半信半疑,而唔去做,我一定會失敗。

如果我秉持住一個夢想,即使知道好難成功、即使知道好大機會失敗、即使知道我走出嚟會俾人恥笑、會俾人唾棄、會俾人謾罵、會俾人打壓,但我都依然繼續去做。

人冇夢想同鹹魚有咩分別?所以我繼續去做,一年之後嘅今時今日,你見到我梁天琦企左係依度。但其實一年之前,我只不過係一個廢青,搵唔到工,乜嘢都做唔到,乜嘢都唔識。

所以今時今日大家有咁嘅夢想(手拍「香港獨立」佈景板),大家要繼續保持依個夢想,終有一日我地會成功。

依一刻好多人會恥笑我地,覺得我地痴線。但係一年前嗰陣,有邊一個人諗到依四隻大字會影響到咁多香港人,會走嚟依個地方集會?一年前你講呢四隻大字,會俾人話痴線,打機可能得,唔好發夢喇。但一年之後有呢個集會出現。

再一年後會有咩事出現?我唔知。但如果我地依班人,以及社會上好多未嚟嘅人,繼續保持依個夢想嘅話,我地一定可以實現依個夢想,一定會成功。

係呢一刻,非常之黑暗,但我相信大家都睇過蝙蝠俠,咁蝙蝠俠裡面有一句對白,就係話黎明之前嘅黑暗,係至撚黑暗。真係好黑暗,但係黎明即將會來臨。多謝大家。

光復香港!時代革命!

發表意見