立場新聞 Stand News

有乜「公能」?乜嘢「瘋範」?有乜「糕見」?

2019/4/17 — 13:09

昨天晚上,我已經估到有某人一定會用呢單野嚟抽《蘋果》水啦。未翹起條尾已經估到佢哋呢類人想點。

但呢次我唔會話佢哋完全唔啱喎!

廣告

因為任何人俾人咁樣影咗擺上網,都係好有問題喎!當然,電影明星,與任何有在社會上有影響力的人一樣,都應該自重一點。所以我本來都冇打算食呢單嘢花生。

不過,我一向都認為不應「以人廢言」,就算是廢人之言也可以對各界有所啟發。所以決定也響應一下「所謂國家領導」的號召,剝少少花生。

廣告

俾人影咗啲私人行為擺上網,當然係有啲不幸,的士佬肯定係唔妥。但人人也應該知道自己身份,要謹守一些行為準則,特別是在社會上有知名度、有影響力、有權有勢的人。舉個例講,明星歌手又點,高官又點,特首又點,「所謂國家領導」又點?知名人士都唔可以去到機場指住個鼻,就要機場保安違反保安程序,做一啲唔啱手續嘅嘢。如果真係咁做咗,俾人影咗,俾人知道,俾人將録音或片段放上網,有乜好怨?

哪,呢次安仔就做得啱啦!唔好郁啲話告人,出嚟道句歉,公開認錯咪好囉!這一種風範,連被視為戲子的藝人都識,值得所有「所謂國家領導」參考同學習。

今時今日,真係好多時都會覺得啲「所謂國家領導」連某啲低水平戲子都不如!更遑論要與越來越多有社會良心的演藝人比較了!唉!

再者,如果真係咁關心私隱問題,咁關心啲視像鏡頭會否被濫用,點解唔批評一下依家每個人去到大陸就會平均分到兩個監視攝影鏡頭?全國據說有 26 億個喎!「所謂國家領導」冇意見?

如果咁重視傳媒的採訪操守,「所謂國家領導」點解又唔要求記協關注下喉舌報章搵人跟蹤及滋擾鄭宇碩教授足足幾個禮拜?而且仲唔止一次!點解「所謂國家領導」粒聲都冇出過?

有記者入到去《消失的檔案》的放映會,不是做採訪,而係借機干擾放映程序,衝擊工作人員及導演,這又是記者的功能嗎?點解「所謂國家領導」又係冇嘢講?

仲有,點解作為報紙的新聞報道,香港電影金像獎報導裏邊竟然冇咗「最佳男演員」嗰項?「所謂國家領導」又冇扮 KOL 喎!

這是什麼瘋範?這是傳媒機構應該有的功能嗎?使唔使又呼籲記協關注一下?使唔使又乘機向大律師公會叫陣?點解又唔見「所謂國家領導」表達下他的糕見?「所謂國家領導」究竟想在香港社會發揮什麼公能?

日日數頭版廣告,點登廣告的機構名,這又算是什麼瘋範?這是不是「所謂國家領導」應該發揮的公能?也想聽聽「所謂國家領導」的糕見。

傳媒要求公眾提供相片提供資料有咩問題?政府不也在鼓勵市民舉報隔籬屋有冇打仔,有冇不良舉動啦!房屋署有埋舉報表格啦!

又講番遠啲,鼓勵學生舉報老師上堂有冇講啲被當權者視為政治不正確的言論,這又是不是教育管理部門或者政府應該做嘅嘢?

同樣性質的問題,同樣的邏輯,點解「所謂國家領導」總會有完全唔同嘅標準?

我認為答案就好簡單啦!因為係《蘋果》囉!因為要不斷發表糕見,以發揮佢嘅公能吖嘛!因為要繼續「一日一蘋果」吖嘛!

擺到明係抽水,駛乜講標準㗎!

我唔單止中文水平差,成日寫錯中文字,有啲英文字的真正意思有時都唔係掌握得幾好。突然間諗起個字,Hypocrisy,有冇人知點解?

 

作者 Facebook

發表意見