立場新聞 Stand News

未來四年 睇嚟都係鑊鑊高潮鑊鑊甘

2016/10/13 — 18:49

「未來四年靠佢控制會議,講笑啦!」(2016年10月12日,梁君彥成為立法會主席後會見記者)

「未來四年靠佢控制會議,講笑啦!」(2016年10月12日,梁君彥成為立法會主席後會見記者)

未來四年,睇嚟都係鑊鑊高潮鑊鑊甘,點解?希望自己唔係太快下結論啦。

因為 ——

有個咁嘅主席:

廣告

望之不似人君,嘴面令人討厭,談話令人反感。仲係零票當選嘅功能議席議員,直頭係政治原罪。加埋做咗幾屆,睇唔出佢有咩政治智慧;學唔到曾主席識得將道理同歪理夾埋嚟講,convince 唔到你都可以confuse你。佢仲要擺個款出嚟以為自己有大把。未來四年靠佢控制會議,講笑啦!

有一班小學雞議員:

廣告

這裏面有新丁小學雞,有老餅小學雞。禽日現晒形。新丁小學雞要搞搞新意思,要為抗爭而抗爭,總之就係心口有個勇字,要搞寸個party。佢哋讀得書少,理論水平有待提升;講本土、講革命、講抗爭、講支那,但對呢啲概念背後嘅歷史含意及現實作用,仍然未發展一套完整嘅策略及思考。唯有希望佢哋慢慢會有進步。另外有個別甚至可以話只係食雨傘運動嘅免費午餐,博懵博大霧。另外有啲就擺到明係十個救火的少年。

重記唔記得歌詞,冇緊要,我記得,例如:「其中一位想起他少鍛鍊,實在是危險,報了名便算」;又或者:「在這社會最怕走得太前,罷了罷了,便歸家往後轉」。選完一個月,加埋禽日場大龍鳳,現晒形啦!另外幾個,放長雙眼睇落去再作結論。只希望那些充滿良好願望,希望透過選票求變嘅選民,唔好最後發現自己全線崩潰啦!

至於老餅小學雞,有一位已經自己砍頭埋牆自殺,仲要攬住人嚟死添。不過,一雞死一雞鳴,雛鳳唔一定清於老鳳聲。可能只係用另外一種方式來做戇居嘢。作為只有選票嘅選民,千祈唔好盲目相信所謂嘅資歷。有啲議員做耐咗,你哋想unlearn 佢哋已經習慣咗嘅處事方式,或者要改變佢哋已經石化咗嘅腦袋,有時仲難過生個仔出嚟重新由頭教過。禽日大家有眼睇啦!

有一班已經完全失去獨立生存能力嘅建制派議員:

佢哋可以話已經去到爐火純青。任憑你點鬧佢,佢哋面皮厚到完全冇反應冇感覺;只要阿爺下令,幾戇居嘅事都夠膽做;只要政府吹雞,佢哋都會奮不顧身,不理廉恥,即刻將個腦塞入肛門嗰度。唔好睇小佢哋,佢哋好多有博士學位,又有名校學士學位。

信不信由你,一日佢哋D律師未跟進完,都不能準確地證明嗰D資歷係假嘅。其實禽日長毛已經用佢嘅發言說明,真正有料嘅人,學歷唔一定係高,只有嗰D以公開講埋啲低能嘢嚟向全世界證明自己冇腦嘅建制派人物,先至有需要買學位。呢班建制派質素越來越高,又有大狀、又有律師、又有大學教授,但係佢哋嘅反應及表現,更加似傻女、爛仔、潑婦。

有乜辦法,有阿爺照,真係大晒,爛泥唔再係扶唔上壁,重要扶上議事堂,妄稱尊貴。其實就是任人差遺,身為下賤。所有因此而產生嘅無能感及自卑感,唯有上到議事堂打駡非建制時的那一刻,才能夠感覺到自己一瞬間嘅英明神武。你哋諗返禽日石主席高叫護衛:「Dum佢哋出去」,嗰一刻,幾英呀!我覺得佢直頭高咗四吋。至於民騙聯主席見記者話要追究不依規矩食生菜D候任議員嘅時候,我直頭覺得佢重靚過世界級領袖個第一夫人(我意思係阿 Trump嗰個可能拍過小電影的走婆)。你話啦,有啲咁嘅建制派議員,有乜辦法唔係鑊鑊高潮。

除此之外,仲要唔好忘記,有一個好管閑事,最鍾意插手干預人哋屋企事務嘅淘三姑。佢恃住自己係中央派落嚟,以為已經集齊舊日粵語殘片那十兄弟的特異功能,包括千里眼(乜都睇晒)、順風耳(乜都聽晒);重要硬淨過韌皮四(成報點揍佢都刀槍不入)。

以前最多都係學遁地八,古古惑惑匿埋搞事,依家就目張目膽,做埋大口九同大喊十,大大聲喊話,指指點點,說三道四,亂咁吹風,鍾意小事化大亂咁告狀。總之就係要搞到你家無寧日,雞犬不寧。重要自動進化,雙手越伸越長。

有佢喺度搧風點火掩是鬥非,小學雞議員自然要作出積極回應,跟住建制派飛撲出嚟撲火,跟住呢個低能主席好有可能插隻腳落去玩泥漿摔角,特衰政府又會加柴添油。搞到成個議會?火焚身,個個㷫烚烚。有乜辦法唔係鑊鑊高潮鑊鑊甘。

這一屆立法會咁,有咁嘅卡士陣容,咁強勁嘅配搭,未來四年肯定場場好戲,折子戲都會變戲肉。重唔係鑊鑊高潮鑊鑊甘?大家買定花生,炮谷入定貨,担定櫈仔睇好戲。都唔知會係喜劇定係悲劇!總之開場散場,一定要高唱「主祐吾王」,買個安心。

有冇講漏咗?冇吖!

哦,你哋話特衰政府。使乜理佢,香港重有政府咩?一個政府,未落台就不斷搞事製造問題,依家就話就算落台都解決唔到問題。咁即係點?咁嘅政府肯定連做茄喱啡嘅資格都冇!有事不如入橫洲揾曾生傾!唔好晒我時間!

 

原刊於作者 facebook

發表意見