立場新聞 Stand News

本土派依靠的是身份認同 傳統社運強調的是價值追求

2015/6/3 — 12:46

本土派vs傳統社運的分別(評論)

首先,要討論「本土」同「傳統社運」,我哋必須作簡化。因為兩邊其實有好多細分派別,例如:「本土派」有啲係城邦派、獨立派,歸英派……同樣「傳統社運」同樣係好多派別:什麼基進派、自由派、左翼,咩都有……如果真係要簡單一句總結兩邊差異:「本土派」依靠的是「身份認同」;「傳統社運」強調的是「價值追求」。

唔明?再直接啲就係──「本土仔」:我要為香港人的利益去抗爭;「傳統社運」:要為「自由、平等、民主……」抗爭。

廣告

由此發展,雙方著重的議題都會不一,就算係同一議題,都會有不同著眼點。

例如,係普選議題上,同樣的「篩選制度」:

廣告

「傳統社運」會批評:令「人民」的提名權「不平等」;(著重價值批判)
而「本土派」會批評:令「香港人」喪失「自主權」。(著重香港人族群利益受損)

理論上,雙方思想唔一定係矛盾。例如「傳統社運」講基本的投票權,你都要劃清條界,係「香港人」先投得,所以你點都要講下「身份認同」;

而本土派係好多議題上,去判斷、証明香港族群得到某「利益」的合理性,都需要一定既普世價值(例如民主、平等、自由)去支持。

咁點解呢兩班人日日嘈?仲煩過方仗?

好似係因為雙方代表的新舊勢力,都爭逐緊香港社會運動的主導權,加埋雙方行動路線唔同,又有私人新仇舊恨,就搞到咁囉。(撈埋做瀨尿牛丸work唔work?咁我哋個台獨仔作者,寫文都講普世價值嘅)

點解我無啦啦寫啲咁敏感嘅話題?因為我準備寫啲再敏感啲囉!現時雙方有一個最重要的分野,就係「民主中國」。而係本人睇黎,暫時雙方都理據都有一定缺失。我會再寫下篇,化身「鍵盤諸葛」,寫篇評論。講到明,我係撐「民主中國」!

唔支持「民主中國」?無所謂,大家君子討論,睇完之後再鬧爆我囉!

 

 

文:19財籽@9olitics編輯隊

*由於今次認真討論mode,咁「左膠」呢個詞有攻擊性,我會改用「傳統社運」。據「本土派」指好似係因為「傳統社運」大多係左翼,即係反資,用階級角度理解社會問題。而傳統社運有一套被受質疑既行動模式,例如非暴力,遊行,運動內民主,唱今天我(?)等,因此被人話「膠」。組合起黎,「傳統社運」就一律被打成「左膠」。

原題為〈「本土派」依靠的是「身份認同」;「傳統社運」強調的是「價值追求」〉

發表意見