立場新聞 Stand News

「本土興起」唔排拒外來語 但必須分主次莊閒

2016/2/24 — 10:10

圖由作者所配

圖由作者所配

認真講。

香港最大嘅心魔,唔講「大中華」,仲有一樣係「殖民地馬仔」心態。

點解香港會用英文?係因為當年殖民主係用英文呀。而剛好英文係世界語言,所以香港先乘到呢陣東風之便呀。英文喺香港嘅地位,本身就係由「殖民主義」而來。所以由條例上去睇「廣播公司可否播普通話」,本身就係迂!腐!愚!蠢!扮客觀扮科學扮理性!

廣告

而香港人亦慣咗「有個統治階級嘅異語言」,做慣殖民地馬仔,殖民主嘅語言就係高一級嘅語言。所以英殖走咗,中殖黎咗,「普通話」即時貴格咗。你估真係「廿一世紀係中國世紀」呀?係因為換咗殖民主咋!

當然,普通話之邪惡,係除咗用「殖民主貴語」做包裝外,仲加多層「大家都係中國人」嘅大中華思想。兩毒併發,令普通話鏟除燦語更加得心應手。

廣告

咁點解香港人以前又唔反英文,而家又要反普通話?時代變喇,首先「殖民主義」呢一套已經不合時宜,喺遠古(即係 Kursk 果個年代),殖民主義或者大行其道,但其實反抗一直都存在,因為佢嘅本質係剝削。而殖民地,除香港外,幾乎全部都有一個本土文化覺醒然後國家獨立(無科學期刊,絕對以偏概全,歡迎舉反例),而文化覺醒,就係本土文化要興起,要成為當地主流。

呢種「本土興起」係唔排拒其他外來語同外來文化,但係必須分主次莊閒嘅。即係印度人都會講好多英文,甚至英文做官方語言,但就係「印度英文」咁囉。

所以由「睇廣播條例」去決定支唔支持普通話廣播,係萬分危險,例之嘛,「唔與時並進」咪改囉,遲啲改埋做法定語文你班友係咪照跟呀?

本土派就係話你知「唔係」!因為文化就係取捨,文化就係喜惡,文化就係主次。殖民地嘅歷史發生過一次,我哋要解殖,就唔可以畀佢發生第二次,第三次,第四次!

 

原刊於作者 facebook;標題為編輯所擬

發表意見