立場新聞 Stand News

李力持:唔好立亂就話「我係香港人」

2015/4/28 — 20:40

親建制網絡媒體「港人講地」早前請來導演李力持拍片,用各種奇怪比喻嘲諷要求真普選的大眾,不知何為國際標準,卻只懂叫口號。片段一出隨即引起反對者抨擊,李後在facebook上稱自己的言論只是「攪下笑」。李力持今午接受商台《人民大道中》訪問,形容香港人「人各有志」,不應隨便說「我係香港人」,「你知道香港人有幾多人咩?」:

好多人去完台灣都話幾好喎,想移民過去;我亦聽到好多話想移民返去大陸。人各有志囉,唔好「立亂」就話「我係香港人」囉。你知道香港人有幾多人咩?知道有咁多唔同嘅分類咩?大家都有自由可以喺香港發言,喺香港行,你有你、我有我行,唔好搞到人哋囉。

對於言論備受批評,他指自己「講嘢不嬲都係咁」,「我都承認嘅,有啲人佢就係唔笑,佢聽咗,就係鍾意唔笑呀嘛,咁點吖?咁我唯有行開搵嗰啲識笑嗰啲㗎啫,唔浪費時間。」至於在網上被圍攻,他續指理性討論可以,「但係粗言穢語我的確有少少唔習慣」。

廣告

李力持又指,自己公司能望到舊啟德機場空地,由90年代末到今日2015年仍未發展:

「唔好講話邊個搞到咁樣,但係我覺得有問題囉。當人哋已經呯呯嘭嘭係咁起、係咁發展,你居然唔發展唔發展,一發展又話你呢樣嗰樣唔得;你唔發展咩,又鬧你做咩冇嘢發展…我諗要抽出個元兇囉,裏面睇吓有冇蟲、cancer,睇吓可唔可以用啲標靶去治療佢囉。」

廣告

對於政改問題,他則以「選班長」來比喻:

「有啲人好關心選班長,但係有啲就冇乜所謂,邊個做班長都得。大家咪傾囉,係咪呀?亦都唔係話,嗱如果呢個班長一選到,你死啦!有時表唔表達意見,茶餘飯後大家茶餐廳吹水咁解㗎啫,唔需要搞到好似就嚟世界末日,我又完全冇咁嘅感覺囉。」

發表意見