立場新聞 Stand News

李超人退得其時

2018/3/19 — 7:24

李嘉誠,圖片來源:無綫電視片段截圖

李嘉誠,圖片來源:無綫電視片段截圖

李超人退休,香港本地財團洗牌,財閥勢力在梁振英年代開始重組,梁營財閥新世界、恒隆陳啟宗、羅康瑞等被視為新利益集團,殊不知689過海神仙,最後收割的,是近年形象比李嘉誠好,大家年紀相同,近年各行各路,香港第二富豪恒基四叔。加上今天林鄭揸旗,四叔更加冇得輸。

李嘉誠集團投資已經全球化,大陸同香港所佔比重只係十幾個巴仙,非不為也,實在不能也。地產是香港最搵水之行業,但今時今日填海造地艱難,鐵路沿線及上蓋開發又需時,唯一土地資源就只有新界農地。689上場立即推倒曾蔭權訂下新界東北官地收回發展模式,2012年中林鄭不惜打倒昨日之我,幾個月內轉軚,由支持政府收地改為支持公私合作。新界粉嶺皇后山曾蔭權原本劃作天主教大學的用地,突然之間又推倒改變為住宅用地,而原來在周邊農地可以因此變成屋地,價值連城。

過去五年政府美其名增加土地供應,解決住屋問題,但公屋輪候時間由三年升至五年,珍貴的土地去咗私人發展商度。林鄭去年施政報告主打房屋政策,竟然唔係起資助房屋,而係叫人買樓置業,推出港人首置上車盤,疑透過地契條款交由發展商混合發展,並在賣地計劃中,選取觀塘安達臣道一幅兩公頃住宅用地興建約1,000個首置單位。呢個蠱惑招最開心當然新界農地大地主,只要攞五百至一千個做首置單位,搞公私合作,就可以成幅農地改劃為屋地,土地價值自然又大幅增加。至於排住隊申請上城規會的計劃,好似南生圍,在現屆政府取態下,十拿九穩。有人認為最近南生圍大火係先破壞後發展,以地產商角度而言,其實根本唔使用呢啲揦鮓招。

廣告

四叔政商關係亦比超人高,好多人唔留意補選勝出的民建聯鄭泳舜,在選舉論壇上曾被對手姚松炎質疑他在恒基家族創辦和注資的慈善機構「家園基金」擔任副總幹事,會被地產商操控。而家園基金下邊搞家園便利店,合作夥伴是新家園協會,此協會政治後台強硬,2017年第三屆董事會就職典禮,全國政協副主席董建華、特首梁振英、候任特首林鄭月娥、中聯辦副主任陳冬、立法會主席梁君彥等逾千人出席,該會並宣佈歷年累積籌款達4.1億元。時任中聯辦主任張曉明送上為新家園品牌活動「四海一家」題字。

香港地產乃暴利行業,只要搞好政商關係,無往而不利。而香港政商關係網,只搞掂特首一人係冇用,在新時代本地財閥需要協助落實政治任務。今時今日的政治標準,李嘉誠的而且確out了,他樹大招風,香港人跟紅頂白,左膠社運人云亦云,開口埋口地產霸權。真正在新界東北滅村、囤積農地靜候佳音、悶聲發大財、捧出鄭泳舜打敗東北社運代表姚松炎硂朱凱廸,然後輿論再狠狠修理二人,當然唔係李氏力場。

廣告

香港已變,李嘉誠此時退休,合適不過!

刊於蘋果日報

發表意見