立場新聞 Stand News

【東施效顰】撤回之後,真正嘅戰爭先開始

2019/9/6 — 21:45

《法蘭克福匯報》廣告截圖來源:作者 Facebook

《法蘭克福匯報》廣告截圖來源:作者 Facebook

我本來唔信,睇到有人話《FAZ》(Frankfurter Allgemeine Zeitung,《法蘭克福匯報》)都有賣香港政府份廣告之後,我放飯即刻想衝去買份嚟睇。搵咗三間油站都搵唔到。

最後我買咗 Tagespass 嚟睇……

見到份廣告之後,我唔知好嬲定好笑。

廣告

我唔知香港政府係咪真係蠢到咁嘅地步,政府入面決定要全球登廣告嘅人,個腦真係裝咗屎,仲要係滿溢到我自己都覺得慘不忍睹嘅程度。點解我咁講?

一。無民眾支持。眾籌登報,重點係「眾籌」,二萬二千個香港市民真金白銀,唔夠一日籌得六百七十幾萬,呢個就係香港人對民主嘅體現同支持。你係咁巴閉,成日話大部分香港市民支持警察執法,咪叫啲建制派搞返個眾籌,鼓勵啲藍絲陣營嘅朋友課金登報囉!你依家堂堂一個政府攞嚿錢出嚟登報,呢啲叫 Propaganda,睇得報紙啲有識之士,一眼就睇得出,明顯只會有反效果,話你香港政府想粉飾太平。

廣告

二。小學雞。連登仔眾籌登報之舉,政府竟然跟你再大你。足見民間智慧一向都係領先政府你幾個馬位。依家你竟然低莊到做連登仔跟尾狗,只會令人恥笑你。一個政府,官方地用公帑去外國報紙度幫自己政權賣廣告,明顯係小學雞之舉,想要報仇,「你登得,我都登得呀,吹咩!」顯得氣急敗壞之餘,高導演,見到勾結外國勢力嘅證據啦!唔差在,學就學足啲,不如你用埋納稅人嘅錢,搞埋個全球登報展覽呀笨!

三。設計柒到喊。政府作為壓逼人民嘅政權,你有咩可以講啫?你份廣告可以有咩 Legitimation?我哋可以為自由吶喊,為警暴抱不平,我哋一句「Hongkong fällt」(香港淪陷)爆炸性咁填咗版面嘅三分一,一句帶出香港人嘅訴求,德國人一睇就明。唔同政府,唔通你可以寫「Hongkong fällt nicht」(香港沒有淪陷)?無嘢講,標題大大隻字寫香港,加個區徽,加個維港做背景。唔知我仲以為你唔小心印咗啲新移民資料小冊子嘅封面落咗報紙度,隔住個 Mon 都隱約聞到你嗰種七十幾歲阿婆搽到全身都係嘅白花油味呀!你覺得真係會有「宣傳」嘅效果?好心係做設計嗰個,知道根本做唔到,咪白紙黑紙,好似啲訃聞咁,講下政府立場咪蒜狗掃把囉。

我其實都唔忍心鬧啦,一個腦部充滿住糞便嘅決策者,人生都肯定唔會好過。但係呢個登報計劃,一定可以成為關公災難嘅黃金例子。

 

作者 Facebook

發表意見