立場新聞 Stand News

林鄭在哪兒?!

2019/7/24 — 18:47

林鄭月娥與官員離開

林鄭月娥與官員離開

【文:阿臣 @全民教育局 HKEd4All】

好多個月一隻字都無寫過,係因為寫極我都唔滿意、覺得篇文太廢,拎出嚟獻世都廢時。但今日聽完兩段聲音之後,不吐不快。

第一段,係香港電台第三台一個下晝嘅節目,訪問身在海外嘅湯家驊。湯嘅回應其中一句,係「誠實啲,我哋無人預計得到會變成咁大件事。」第二段,係行政長官及問責團隊開的記者會。聽唔曬講啲咩,但係林鄭招牌式嘅串咀「我以為我答咗……」呢句一出,記者們群情洶湧,從聲音聽得出,如果記者係有如 21 晚喺元朗嘅暴徒,一定會打到呢個政府班子頭破血流。

廣告

由民間 4.28 第一次行反對逃犯條例修訂的遊行開始,政府一直都無理過民間嘅聲音。行動升級、衝突加劇,就只係識得譴責。今日記者會中,有人問及除咗譴責仲有咩回應嘅時候,林鄭只係識得話一定要譴責暴力。由十三萬、到 6.9 嘅一百零三萬、6.16 嘅二百萬人,政府有理過咩?!  依家叫我理性表達訴求?我理性嘅時候你當我死,我暴力你就只係識得話我暴力。試問,你想我點?

依家香港整體社會就係擺明唔妥你林鄭、擺明唔妥你呢個問責班子,依家呢個政府只係同我講「也許工作有做得不足嘅地方」。也許?! 即係證明呢個政府,由頭到尾都無聽過入耳。

廣告

恃住自己係熟制度、「專業」公務員,依家就當正自己係「聖人」,但就係一個死要面嘅「聖人」。由最開頭叫佢撤回草案,就先後用擱置、壽終正寢,但係就死口都唔肯用撤回。再由一個唔識刑法嘅律政司司長,叫我哋唔駛咁「咬文嚼字」。蝦我無讀過 law?法律有邊一日係唔關文字事!再嚟就有李家超呢啲無限輪迴式解說,不知所謂。

呢堆友已經好離譜。你哋 run 緊嘅係政府,就算道理響哂你到,但人哋唔鐘意,就只係識得打人哋做「唔識嘢」、「廢話」,連稍稍回應吓都唔覺。更何況有一百萬人上街之後,繼續二讀,擺明當香港人死嘅。更離譜嘅,係有人助紂為虐,可以睜大對眼話事前邊度諗到?! 平衡時空完結,終於發現原來成個政府已經同民意脫軌。

用專業做幌子、「耍走式」回應,我以前有篇文寫過,當時都係鬧緊林鄭政府上場後嘅事。但當時嘅事,同今日整個香港嘅局面係無得比。

原來林鄭嘅專業,係在於專業「龜縮」、專業「譴責」,但解決問題能力完全零分、同理心零分。整個問責團隊只識擦鞋,一見國徽受損就爆緊張,但對於幾個年輕人嘅輕生、整個社會一次又一次嘅呼喊,卻視若無睹、置若罔聞。咁嘅政府,仲憑咩要管治威信。連最基本嘅誠信同應受性都蕩然無存。下台係應該叫,但我同《金融時報》傳中央不接受林鄭呈辭嘅想法一樣,clean up the mess before you go. 我寧願佢呢三年做跛腳鴨政府,俾人民抽佢後腿,最少仲有機會可以響其他範疇有機會有啲改變,但我完全明白佢唔改變嘅機會更高。

全民教育局製圖

全民教育局製圖

 

全民教育局 Facebook

發表意見