立場新聞 Stand News

林鄭捐錢民主黨 葉劉否認「葡萄」 「唔方便批評」中聯辦助民建聯籌千萬

2018/3/22 — 11:47

葉劉淑儀

葉劉淑儀

特首林鄭月娥前晚在民主黨黨慶晚宴應捐3萬元,引起關注。新民黨主席葉劉淑儀今早在港台節目再批評林鄭月娥做法「不智」、「瓜田李下」,負責社交網站的「伙計」上載相片加上「#大和解」,更加是缺乏政治意識:「咁你係咪用錢買和解啫,和解應該用誠意,真正和解盡量達致共識。」有聽眾質疑,為何葉劉不批評捐字畫予民建聯拍賣的中聯辦,葉劉稱,「中聯辦我真係唔方便批評,佢哋唔受香港法例限制 … 其實影響咗有啲人對民建聯的觀感,所以我哋唔會咁做。」

葉劉淑儀提及,過去新民黨曾邀請歷任特首出席黨慶,但無從未有見特首會捐錢,「下次,我哋又找人唱歌,搵特首捐錢,捐得幾多呢?特首啲手下要提佢 … 而家累到民主黨都好大鑊。」

她質疑,捐錢一幕是否事先計劃,「唔知有無夾埋,到底是否即興,無人知。通常如果我搞拍賣叫人捐款,都會單聲『一陣幫吓手』。」

廣告

她又稱,「好多政黨就諗,咁(你)捐唔捐畀我哋,第日我哋又黨慶,個個都有黨慶。」

葉劉否認「葡萄」  「諗自己有無份好正常」

廣告

主持人問到有沒有「葡萄」民主黨收到特首捐款,葉劉淑儀說:「都唔可以講葡萄嘅,咩都話葡萄。咁都會詫異架嘛,只可以講詫異,同埋諗自己有無份,好正常架嘛。都係分配不均的問題。」她透露,事件引起建制派討論,「我哋食飯傾計,個個都問,咁我哋值幾多,捐幾多呢?個個都笑。」

葉劉說,民主黨的定位是泛民大黨,事件同時令該黨尷尬,「同特首行得咁埋,好多人都在網上批評,你是反對派,對支持者或者更激進支持者,就會覺得(林鄭月娥)是否3萬蚊買起你,對於民主黨都好尷尬。」

不會找中聯辦官員寫墨寶   「觀感唔好」

中聯辦過去捐贈墨寶為民建聯籌得千萬港元,例如時任中聯辦主任、現為港澳辦主任張曉明2016年捐贈的一幅「度德而處」書法,由全國政協委員、為解放軍物業提供物業管理服務的「新恆基」集團主席高敬德,在當晚斥資 1,880 萬元投得。葉劉淑儀指:「呢啲社會自然有評價,我哋從來唔會找中聯辦官員寫墨寶籌款,我哋唔會咁,當然成效好,對我哋個黨,個觀感唔好」。

有聽眾質疑,為何葉劉不批評中聯辦,反而批評特首向民主黨捐錢,「中聯辦我真係唔方便批評,佢哋唔受香港法例限制…其實影響咗有啲人對民建聯的觀感,所以我哋唔會咁做。當然,佢有權支持某個政黨,當我哋唔會搵佢(中聯辦)。」對於中聯辦應否克制一些,「佢哋自己諗下,或者諗住幫最愛國的政黨。」

葉劉淑儀又透露,新民黨正打算在今年進行大規模籌款活動,對會否接收特首捐款,她表示:「我哋會研究下,咁可能都要畀個機會佢。」

新任民主派議員區諾軒日在立法會宣誓期間,葉劉與容海恩叫「燒基本法可恥」的口號,她解釋,「你唔可以話(燒)工具就唔算,你用道具槍打刧都是打刧。」主持人問到前立法會梁國雄過去有燒基本法,但過去宣誓時也未見新民黨有此反應,葉劉淑儀稱,對方光明磊落、「不會燒咗唔認」,「梁國雄都無話擁護基本法」。

 

發表意見