立場新聞 Stand News

林鄭熱廚房烤弱雞

2017/4/3 — 7:08

梁振英、林鄭月娥

梁振英、林鄭月娥

林鄭接受傳媒訪問,指組班過程遇到的挑戰是「熱廚房」溫度越來越高,有意加入的人士都要慎重考慮,如自己曾參與兩屆政府組班,形容是不容易決定,要考慮前景、能力、兼顧家人,以及接受公眾監察及支持度等以作決定。其實,要搵人唔難,一大棚西環友、董系馬房及梁粉等住上位,林鄭有冇say no的自由?而佢想「媾」民主派,對方又受唔受?

羅致光、黃英琦、蔡海偉冇政治能量

中間派及民主派陣營應有幾件被林鄭相中,第一頂頭大熱乃民主黨羅致光,兩人在港大年代已經認識,羅專注政策,曾經任民主黨秘書長、政策委員會主席,可以講係大腦。林鄭邀請佢個人當然不會托手踭,但民主黨相信會要羅致光退黨,即係當佢係張炳良,冇面畀,換句話羅致光一入閣就失去政治能量。至於搵狄志遠就仲大鑊,早被泛民指為利益投靠西環,叛徒做局長死多幾錢重,仲衰過搵外邊專業人士,至少冇牙齒印,至於黃英琦、蔡海偉,表面睇形象企企理理,但一樣冇政治能量。

廣告

呢個熱廚房溫度急升已變烤爐,好人好姐又點敢入去,大家記得林鄭由好打得的官員變面成為「梁振英2.0」,係佢一手造成。首先比老董上身,老懵董以為自己唔乞人憎,錯了,香港人對佢仍然持負面印象,另一個係西環極左勢力助選工程,將林鄭染紅,兩大負面因素為林鄭政府「加持」,而佢又唔敢切割,你個Brand搞到咁差,正常人避之則吉,剩低只有三類人會敢博一博:

一、夕陽AO:如果當打升到首長級D6或以上,50歲左右,仲可以玩多十年退休,一定唔會埋單計數轉做局長,剩低就係本身五年內退休可能肯做。AO邏輯好簡單,就是計數,睇睇有冇着數、有冇蝕水。而埋得林鄭堆嘅,多數係yes man或乖乖女,又係冇政治手段及網絡,同常秘屬同一類人,又點可能贏得對方尊重。你試試攞住丁葉燕薇、謝凌潔貞個名去問,一定畀AO笑到面黃。當年曾蔭權點解在政治人才有限下,仍然推動到政策,因為佢夠膽越級起用,bypass常秘一級,直接起用40歲首長級官員,今日林鄭再吹雞,又有冇人會聽呢?

廣告

二、蠱惑政客:明知廚房高溫仍然入去,當然唔係為理想,一係外邊撈唔掂,冇乜運行,局長至少一年飛十幾次考察加幾十萬人工,你睇吳克儉、楊偉雄,最筍係孭大鑊又唔使問責,林鄭為表示自己打得,定必會護短,在鉛水事件已表露無遺。狄志遠、黃成智、張國鈞、周浩鼎……大把畀你揀。仲有,千祈唔好漏咗劉江華呢位人才。

極端管治令社會精英邊緣化

三、搵食學者:九七至今廿年,學術界統戰已見成果,雷鼎鳴、王于漸、鄭國漢、盧寵茂任你揀,唔夠仲可以在周融反佔中聯署名單之中慢慢再揀。畀你加個王冬勝、鄭若驊做財政司、律政司,張建宗做政務司、黎棟國留任保安局,然後升幾件蛋散副局坐正,咁嘅陣容相信乃九七以來最弱雞一屆。過去五年的極端管治方式,是令香港社會主流精英邊緣化,不學無術之徒上位,根本就是一場香港文革。今天新政府要重拾人民信任,一定要徹底否定過去五年梁振英鬥爭為綱路線,猶如當年鄧小平徹底否定文革。否則好人不會從政。

不出一年,惟有又靠中聯辦扶一把送一程,動員新界社團聯會、高佬和一系、愛字頭、長樂、晉江、河源、惠州、汕頭……各同鄉會協力,更好地支持林鄭特首依法施政了。
高度自治搞到猶如無間地獄,已非林鄭一人之力可以挽回。

(文章原刊蘋果日報

發表意見