立場新聞 Stand News

林鄭稱「從來唔做吹風會」 記協前主席當場駁斥

2017/3/10 — 16:32

香港記者協會今早舉行特首候選人座談會,候選人林鄭月娥在席上表示自己「從來唔做吹風會(閉門、不可具名引述的傳媒會面)」,亦從不會以「消息人士」身份向傳媒放風,不會迴避與記者會面。記協前主席麥燕庭質疑,林鄭不但曾舉辦吹風會,更曾為其他官員辯護,指新官員不習慣鏡頭所以要辦吹風會云云,林鄭表示不記得。

林鄭今日在座談上稱,自己為官以來一直配合傳媒,任政務司司長期間「可能係最得最多記招嘅主要官員之一,從來唔迴避同記者會面,亦都從來甚少,可能真係完全冇用消息人士,去發放我作為政務司司長想發放嘅訊息。」

林鄭之後又稱,自己從來不做吹風會。但在席的麥燕庭即指出,林鄭曾經有舉行吹風會,並指現時政府濫用吹風會的程度,已去到不可接受的地步,要求林鄭承諾一旦上任,規定政府政策要在記者會、而非吹風會中交代。林鄭指自己不記得麥提及的場合,亦無就麥的要求作回應。

廣告

被問到香港新聞自由國際排名連年下跌,林鄭則指國際排名多以觀感為準則。

胡官暗批林鄭講咗唔認 斥政府慣晒吹風

廣告

今日的座談會邀請到三名候選人,但三人分別現身,沒有同場辯論,前上訴庭副庭長胡國興是第一個發言。胡國興發言時不點名批評林鄭「講但唔敢認」,早前曾在閉門傳媒會面中,稱自己是因為中央未必任命勝選者、擔心出任憲政危機才出選,指這樣的言論或涉違法。

胡國興形容,現時睇新聞的感覺是「問題多過答案」,不知消息來源何來,對可信性難以判斷,指「放暗箭」者的身份,比暗箭的內容,對公眾而言是更大的公眾利益及新聞價值。

胡國興指,政府習慣匿名放風,但講了又不敢認,有已變為候選人的司長,不知是否亦有此習慣,與傳媒高層搞吹風會,稱中央有可能不任命當選人,或出現憲制危機。胡國興認為,有關聲稱如果是假的,是有可能違反選舉條例,該名人士即出來稱傳媒報道的不是她的意思,便出現羅生門。

胡國興又指,應要求公職人員開誠佈公,政府在陽光下運作,官員應以謙卑態度回應質疑。胡國興指最近特首告議員,幕僚應該勸阻,但其新聞統籌專員馮煒光,竟在專欄叫人食花生。他指,自己若當選,自己的新聞統籌專員不會是服務特首,而是服務新聞界。

附:林鄭談吹風會發現節錄

開場發言
過去四年半任政務司司長嘅日子裏面,我都秉持配合新聞採訪,我相信我可能係做得最多記者招待會嘅主要官員之一,從來唔迴避同記者會面,亦都從來甚少,可能真係完全冇用消息人士,去發放我作為政務司司長想發放嘅訊息。

談新聞自由國際排名下跌
好多呢啲國際排名…好多時係觀感。一講到觀感,打開報紙都發覺有問題,大家每日都會講採訪過程、又有新聞工作者受襲、有商業行為在新聞機構內發生,所以我哋同時都要處理觀感嘅問題。(競選)呢七個禮拜話我聽,觀感有時都會變咗現實,所以要好小心去應對觀感嗰個問題。

談吹風會
林鄭:(記協報告)認為影響緊新聞自由的官方嘅行為,我都用來量度我自己,覺得我都合格。因為我從來都唔做吹風會,亦從來唔做隱蔽消息人士,有問題要澄清就行出嚟做記招。

主持區家麟:你曾在一個午餐會講重要嘅政府立場宣示(政府不接納真普聯方案),但冇開放畀傳媒拍攝錄音,只係圍內傾…

林鄭:咁我都要尊重場合同主辦機構,無時無刻都有啲嘢閉門,有時請我去都話明係閉門㗎嘛…有啲情況下話明係閉,我就會好坦白,我係一個直話直說嘅人。…有時閉門講嘅嘢,未必可以係公開嘅場合咁樣分享。

記協前主席麥燕庭:在坐有傳媒參加過你嘅吹風會,係政府嘅吹風會,你仲喺席上為吹風會呢種安排,解釋話,因為有啲官員好新,要對住咁多鏡頭講嘢佢哋會驚,諸如此類。好明顯,你自己都有搞過吹風會嘅。你可唔可以承諾上任嘅話唔搞吹風會,政策要喺記者會宣佈?(官員)已經濫用吹風會去到不可接受嘅地步。

林鄭:頭先我講完都好小心畀個註腳,應該係「絕大部份時候」都冇。我都唔記得,不過一定係政改嘅問題…(台下補充提問)發展局?發展局有咩嘢需要吹風呢?我做發展局期間係透明到唔透明,因為發展局係同社會發展、基建有關啫,我真係從來唔會主動安排一啲咩吹風會㗎喎,或者你可以講返畀我聽。…所謂吹風會、消息人士,就唔係我嘅風格嚟。

發表意見