立場新聞 Stand News

核電還核電,民主中國還民主中國

2016/6/3 — 11:05

台山核電一號核電島工程地盤(資料圖片)

台山核電一號核電島工程地盤(資料圖片)

最近有個講法,話大陸響香港周圍起好多核電廠,比如台山核電廠,嚴重威脅香港。香港唔能夠諗住獨善其身,因為即使香港獨立,隔籬一旦核爆,我地都會死晒。基於「不能迴避中國因素」,所以香港人就要「建設民主中國」,如此方能自保云云。

以上講法有冇道理?有少少。不過核電廠同港獨冇必然關係,唔應該炒埋一碟。先旨聲明,我一向反對大陸起核電廠,因為「中國的會爆炸」,你懂的。台山核電廠係咪嚴重威脅香港?當然係!我地應唔應該關注台山核電廠單野?當然要關注!但關注原因唔係因為「大家都是中國人」,而係最直接的理由:「你而家威脅到我條命呀仆街!」

將核電廠同「建設民主中國」綑綁埋一齊,呢種觀點好奇怪。第一,有民主都可以核爆的。全世界不論專制政權定民主國家,都可以有核電廠,一樣有洩漏風險。美國係民主國家,有過三里島事件;日本係民主國家,有福島核事故。民主中國都唔保證到台山核電廠會唔爆的。咁當然有人會話,「有民主的話,理論上可以向政府施加更大壓力,逼佢關廠嘛!」咁民主左大陸市民都可能會想保留核電廠架喎,今時今日仍然有民主國家繼續用核電架喎。須知道呢個世界有好多人盲目追求經濟發展,漠視環境安全,而大陸就最多呢類人喇!如果有民主就冇核問題,咁美國同日本當日就唔會出事啦。講明先,我唔係反對民主,民主當然係好野,問題係唔能夠一講到台山核電廠就立即跳躍去「建設民主中國」,強逼香港人接受同中國人做「命運共同體」丫嘛﹗中間幾十個過程唔駛論證架﹖左翼好興講既「道德證成」去左邊﹖自有永有呀﹖

廣告

第二個問題係,隔離有核電廠,點解就代表我地有責任去「建設民主中國」?中國會不斷再起核電廠,如果有日佢地響中印邊境起一個,咁印度人又有責任「建設民主中國」了?如果響中俄邊境起,咁俄羅斯人又要去「建設民主中國」了?福建起多幾個,幅射範圍去到台灣的話,咁台灣人係咪又有責任「建設民主中國」?點解左膠唔用呢個邏輯去怪責台灣人唔關心大陸民主,試圖「置身事外」?由此可見,有冇核電廠同我地去唔去建設民主中國並無必然關係。

至於話港獨之後,都「不能迴避中國因素」,呢句更加係廢話。全球化年代,而家有邊個國家可以「迴避中國因素」﹖美國咁強,都迴避唔到「中國因素」啦﹗咁係咪美國人都要一齊建設民主中國呢﹖又有邊個國家可以「迴避美國因素」﹖駛唔駛大家一齊做美國人,進一步改善美國民主,去避免美國帶俾世界的「負面影響」﹖

廣告

根本問題係,而家中國呢個惡鄰,就係一個周圍蝦蝦霸霸既土豪,有邊個會想同佢地做「一家人」﹖香港近年有港獨思潮,正正就係了解到自己同中國唔同,唔想再同中國人做「同胞」,唔想再同中國攬埋做咩「命運共同體」。你試下問問台灣人想唔想同中國做「命運共同體」﹖你唔會問,因為你知道台灣人唔肯,而且你咁問簡直係侮辱緊佢地智慧。咁點解香港人又唔可以好似佢地咁諗﹖

左膠好誠實,佢會同你講,台灣始終有道海峽,香港同大陸相連,而且我地唔夠大陸打。u no gun嘛。咁所以我地就要硬食架喇﹖如果恐怖份子拎住大型殺傷力武器周街走,大家唔想死,就要同佢做「一家人」﹖乜野邏輯呀﹖我唔夠你打,我寧願同你攬炒都唔要同你做乜野「同胞」呀﹗唔想同你做咩「命運共同體」呀﹗學古思堯話齋「死開D啦」﹗人有尊嚴架,你鍾意做奴才就自己做飽佢啦。

至於講返核電廠問題,咁點算呀﹖人地響隔籬係咁起,我地再勇武,都唔可能跨境去破壞佢間廠丫,更何況咁樣仲可能適得其反。咁如果係其他主權國家遇到呢種事,會點做﹖即係如果印度不滿中國響隔籬開核電廠,佢唔會寄望唔知幾多百年後先有可能出現既「民主中國」,而係會先訴諸外交途徑,再唔係就經濟制裁,甚至軍事衝突啦。咁當然以上方法全部都唔適用於香港,因為中印係真正地位平等既主權國家,而香港響急速赤化下好快只會係中國南方沿岸的一個「深港市」。所以講到尾,首先,你要有一個國家。

發表意見