立場新聞 Stand News

梁特掛帥的整風運動

2015/10/12 — 7:42

梁振英

梁振英

特區整治知識分子,沙塵滾滾,殺聲震天,香港學者庇託於英殖良政善治,避過中式醬缸政治、泥漿摔角,殊不知大學桃花源九七後已變質,於是文人學者互片之醜陋面目天天公演,醫學院神醫變成誣醫,擅長思考方法的「哲學大師」,原來也是高智低能政治白癡。傳媒披露梁振英親自披甲上陣向馬斐森施壓,仲有跟手派幾位悍將闖將空降反斗大本營嶺南,可能鄭國漢校長唔多夠力,文化研究學系睇怕快將陷入政治風暴之中。

呢場整風運動,始於2012反國教,內地對香港知識分子及大學生不滿早早宣之於口,真正爆鑊是李克強出席港大百年校慶風波,港大校方處事有欠周詳,加上警察發神經,將港大及薄扶林道實施「準戒嚴」,結果總理一面灰,一心擺出討好香港知識分子姿態,最終敬酒飲唔成,就變成飲罰酒了。梁振英上場,深紅特首引發赤化恐懼,浸會大學一本國教小冊子「中國模式」亂七八糟吹噓共產黨成就,香港人反洗腦兼反共的集體情緒大爆發。跟手學民思潮崛起,而剛剛遇上政改,戴耀廷吹水提出佔中理念,學聯學民乘勢而上,將佔中由務虛變真做,佔領預演、九二二罷課、重佔公民廣場,最終迫使梁振英履行承諾,「總有一次要用防暴隊及催淚彈對付示威者」。

呢場特區整風運動遲早要來,問題由梁振英去執行,只會越搞越大煲,不單無法達到預期效果,而且會更進一步激化矛盾,令佔中、退聯及政改後本已冷淡及分裂的院校政治氣氛,重新活躍起來。梁振英革走民政事務局局長曾德成,要佢為青少年政治教育失敗孭鑊,目的係向北京表明今後整治知識分子、各大專院校及青少年工作,不再靠傳統左派,將由特首本人一把抓。大家在陳文敏事件中對梁粉之勇武,兼具爛仔味及劣質政治手段大開眼界。

廣告

今次再派何君堯、陳曼琪入嶺南,肯定又係搞大龍鳳。總之任何政治工作由梁振英經手,總會大鑼大鼓慌死條街冇人知。就以「港獨鬥爭」為例,本來冇人理,但經施政報告一點評,《香港民族論》立即斷市,越鬥就越多人知,多人知就自然由邊緣進入主流。本土主義在大學內流行,梁振英功勞最大。當日高調砌港大《學苑》已經表示特首掛帥整風運動,但手段粗糙拙劣連建制派都擰擰頭。

共產黨處事作風是目標為本、注重細節、務實掛帥,點睇都好難理解特區整風運動會如此低水平,急就章,迹近鬧劇,尤其是太多小丑式人物幫腔。今時今日,在知識界搞統戰工作,已難上加難,當李輝之流成為學校建制代言人時,有頭有臉者一見政治就避之則吉。統戰工作是要爭取溫和中間派,將激進派邊緣化,而現時剛剛相反,是惡形惡相,有權大晒,呢種嘴面只有令中間主流同情被迫害者,哲學大師評建制派庸碌,其實大部份從政多年的建制派是有自知之明,所以先收起惡形惡相,庸碌而冇自知之明,先至係最大問題。

廣告

原刊於蘋果日報

發表意見