立場新聞 Stand News

梁特選舉工程的怪圈

2016/5/30 — 8:39

梁振英(無綫新聞片段截圖)

梁振英(無綫新聞片段截圖)

無綫專訪梁振英,出街後負評滿天,最經典係記者問為何去年世界盃外圍賽支持香港隊抑或中國隊,他一直避而不答?佢竟然話:「我當然會支持香港隊,但那個問題的問法,說你只有一個選擇。只有一個選擇,問題是不能答的。(記者:賽事只有一隊勝出)將一場足球比賽政治化,對立起來,一定要你在兩者之間選一個,我覺得是完全不必要的。」

問你死未?支持香港隊,但又唔係支持佢贏波,仲要歸咎於如果支持香港隊贏,就等同將足球比賽政治化!這種邏輯真係聞所未聞。其實,使乜兜咁大個圈,689知道習近平係球迷,怕方丈小器所以唔敢表態,將一場球賽政治化的,其實是689本人,所以先出現「支持港隊但唔支持香港隊贏波」這不知所謂的立場。而更荒謬是689將自己擦鞋揣摩上意之傑作,變成特區政府高層的line to take,林鄭也跟隨689表態,對支持香港隊贏波支吾以對。足球本應就是拉近官民關係的最佳手段,但結果因為689揣摩上意,怕得罪中央,於是好事變壞事。

689展開選舉工程,頻頻利用特首身份做公關show,意圖為自己開脫,但佢始終唔明白,香港人之所以討厭佢,係因為視689為中央傀儡,揣摩上意唯命是從的擦鞋仔,而中港足球大戰,係最能體現689擦鞋仔形象。由2012當選翌日往中聯辦謝票起,市民已經開始厭惡,因為在一國兩制下特首雖有雙重角色,但在角色上首先要在香港這一制取得支持,代表香港利益。這同內地中央地方關係一樣,省委書記一樣代表地方利益,並非事事揣摩中央旨意。如果特首失去香港人支持,只係一個擦鞋仔,從一國角度來看,不如乾脆派個人做港督治港冇咁煩。

廣告

張德江來港,689趁機當作挺梁選舉campaign一部份,從公關安排可見,張訪港前佢上商台做專訪,張走後又去TVB做show,重點表明自己並非極左,也願意同泛民溝通,這些都早有安排,期間再放毒攻擊曾俊華,指他被張訓斥,所有部署均以為自己連任造勢為主。但北京似乎唔願意陪佢玩,官方宣傳口徑一再澄清,張公開支持特首,只是「行禮如儀、官樣文章」,猶如每次述職,均表示支持特首依法施政。而誣諂曾俊華一事傳媒就更加冇人follow。其實張來港會見泛民才是訪問重點,事先大家協商好以「狂插梁振英」為議程,北京打出689這張牌,成功建立雙方對話基礎,這表示中央日後如果要與泛民組成反港獨統一戰線,689這張牌還會打下去。

張走後《信報》立即指中辦下命令對689收UGL五千萬作「政治及法律風險評估工作」,顯示下任特首快到拍板時間,究竟是按原本9月立法會選舉後,在共產黨重要人事安排的北戴河會議上決定,還是提早到9月前呢?相信提早機會好大,因為一旦將689連任問題與9月立法會及12月行政長官選舉委員會選舉一起綑綁,建制派選情定必受拖累。

廣告

這也難怪有人心急如焚,不斷為自己形象做campaign,也不斷自吹自擂偉大政績。可惜當全世界都睇穿那套語言偽術,就變成越campaign越乞人憎,民望越低的怪圈。

 

原刊於蘋果日報

發表意見