立場新聞 Stand News

梁粉自白書

2016/12/13 — 15:29

作者製圖

作者製圖

XX!唔撈?你唔撈,我撈咩呀?呢幾年,我仆心仆命,出賣人格(如果仲有),歪理講盡,成日被人當笑話,為咩?咪係想托起你,等人覺得,你都唔係咁衰啫,仲有我衰過你!一片苦心,可昭日月呀!

仲有,如果唔係我瞓身擋箭,轉移公眾目標,你變咗箭豬啦!咩話?你仲話自己就係做咗箭豬所以motorola,大哥,咁你得罪咁多人,點擋得晒呀?
咩話?呢幾年我都賺唔少?你知唔知我未跟你撈之前,一早風生水起,揸波子,用黑卡,係,我現時係年薪幾球,但每日得嗰一皮嘢咋,我肯跟你為咩?咪就係要證明俾人睇,我係掂嘅,我呢個政治奇才,豈容明珠暗投?

算啦!俱往矣!鴻鵠之志,同你講都嘥氣,你都無得撈啦,我仲有好多嘢撈㗎!撈咩?出書囉!我度好晒,《我在白宮的日子》、《白宮群「英」會》、《白宮與自宮》,一個系列,隨時諾貝爾文學獎都有得攞。

廣告

其實一場賓主,我都唔想你衰,你5,000萬單嘢,縱使我被公認為頂級公關專才,我都諗唔到計去拆局,尤其你去秘撈,唔使做,有錢收,寫句“without conflict of interest”就可以過骨咩?如果係咁易,我都收啦!話時話,立法會條高佬,佢癲㗎,實咬住你唔放!

咩話?DQ埋個高佬?佢宣完誓噏兩句口號「打擊貪腐,狼英下台」,第二句俾佢噏中,因住第一句中埋呀!仲有,呢兩句「國策」嚟㗎,我點知?你無得撈肯定係阿爺唔俾啦,大家咁熟,你咪玩我啦。DQ高佬?咪傻啦!你不如擔心自己俾人捉去坐洗頭艇返大陸「雙規」仲實際啦!

廣告

 

作者 facebook;原刊於 AM730

發表意見