立場新聞 Stand News

梁美芬撐亞視「專業」 聞梁國雄拒「對嘴」反應大

2015/2/9 — 17:34

經民聯立法會議員梁美芬今天在立法會為亞視辯護,自言仍是《把酒當歌》、《高志森微博》、《香港政策組》、《ATV這一家》等節目的觀眾,盛讚一眾視員工非常專業,更為亞視執行董事葉家寶講好話,指他是「唔出糧仍然堅守崗位去幫同事嘅員工」。對於梁美芬又指亞視仍有創作,社民連梁國雄隨即斥梁美芬「亂講」,因為亞視「不停播舊嘢,是將啲時間不斷擺嚟擺去嚟創作」。他又稱,「本身我都唔想同你對嘴架喇!」

梁美芬聽後很大反應、十分抗拒,失笑並厭惡地撥手,比「啋」手勢;連葛珮帆都問「點樣對嘴」,商務及經濟發展局局長蘇錦樑也忍唆不禁,以手掩嘴而笑。葛及後亦來抽水,「我諗阿何主席(通訊事務管理局主席何沛謙)都未必想同梁議員對嘴」。

立法會資訊科技委員會今日討論有關亞洲電視有限公司的運作及最新發展的事宜,委員會主席葛珮帆指,曾多次邀請葉家寶出席今日會議,惟葉今早才回覆不會出席。梁美芬在會上表示,對亞視員工感到「欽佩」

廣告

而呢一樣嘢絕對唔係嗰個台或者啲人工令佢咁做。我都必須披露下,我係做佢嘅(節目)《感動香港》嘅評判,甚至我而家仍然都係佢嘅觀眾,我有睇《把酒當歌》,有睇《高志森微博》、《香港政策組》,甚至一個因為有困難嘅時候(製作的)《ATV這一家》,都係佢新架,為咗迎難而上專門創造出嚟架。你點可以話人哋而家就冇創作呢?

但係喺嗰個出糧嘅問題上,我就覺得嗰個勞工法就真係好荒謬,其實而家告嚟告去,我所知道得一個人,嗰個係受薪董事、佢無糧出、喺度頂嘅,佢就係叫葉家寶...佢又幫手賣地去出糧畀啲同事,又繼續拍嗰個(ATV)「春晚」,都係未出糧,繼續專業去工作,包括新聞部,雖然佢係縮短咗,但都仍然係好專業架。所以你係唔可以喺傷口上面仲要插刀!

廣告

緊隨梁美芬之後發言的梁國雄,狠批梁「亂講」:

妳唔好侮辱啲亞視員工啦!有創作力都唔會留喺一間冇創作嘅電(視)台啦!搵唔到食咋,阿哥......唔係想創作呀!係冇米落鑊呀!市場太細呀!所以梁振英咪可殺囉!(香港電視主席)王維基想做就冇得做!創作晒啲嘢擺喺度喇,妳又唔讚下王維基!佢哋啲創作人員,畀人扼殺晒啲創作,播都冇得播!

此外,議員黃毓民在會上批評,從任何一方面看,續牌給亞視是無天理。人民力量陳志全認為,特首梁振英是全港「最叻」「拉布」的人,因為他遲遲不決定是否續牌給亞視。

民建聯的黃定光認為,亞視歷史悠久,希望能「救生」亞視,不要「一棍打死」。通訊事務管理局主席何沛謙說,一間機構是否適合續牌,要視乎它有沒有遵守牌照相關條款和法例。蘇錦樑則說,會按規則和法例要求考慮續牌事宜。

發表意見