立場新聞 Stand News

梁美芬面皮有幾厚?

2019/9/8 — 9:39

梁美芬

梁美芬

五月底,立法會宴請外國領事,有份出席的梁美芬原來識讀心術,單睇赴宴者眉頭眼額,便知佢哋希望有關修例能順利審議,可能比佢哋肚裡條蟲知得更多。

更加絕嘅係,撐政府無極限的芬姨,原本乜嘢核突理由,都可以輕易講出口,點知一個屈尾十,居然走去電台話自己「用咗好大嘅努力先爭取到橄欖枝」,仲接觸過前線的勇武派,最終「成功爭取」林鄭撤回修例,令網民大跌眼鏡。真係一直錯怪咗佢囉!大家而家先知芬姨咁「用心良苦」,咁為對家著想,不禁開始為佢擔心。

原來佢先係大台,係呢場逆權運動的幕後黑手啊!背後佢同中共口中的外國勢力有無景轟,外人不得而知,但佢對人說人話,對鬼講鬼話,兩面三刀,點到主事者陀陀擰,搞到政府頭都大,累到元朗白衫軍、北角福建幫和荃灣藍衣刀手雞毛鴨血,就毋庸置疑。

廣告

林鄭撤回修例,已經被藍絲鬧佢跪低鬧到飛起,梁美芬今舖,顯然為了選票考慮(等於話反送中係主流民意,連佢支持者的基本盤中都有不少人對政府修例深感不滿,佢權衡輕重後才改口,扮站在廣大市民的一邊),變相話自己係無間道。唔係仲衰,即係話自己棄暗投明,即係話支持政府者和撐警藍絲係社會的少數,道理亦不在佢哋嗰邊。芬姨仲不特止,仲要向警隊恨之入骨的勇武派示好,等於重重摑有參加撐警集會嗰 16.5 萬的人一大巴。如果你一直義無反顧咁撐政府,見到人咁反骨,又點可以吞得下呢口烏氣呢?

好人一生平安,同意請分享!

廣告

 

作者 Facebook

發表意見