立場新聞 Stand News

橫洲報告揭黑上加黑 寫明咪搞新世界私人地

2016/10/21 — 21:15

話說上回我哋質疑元朗橫洲收地黑幕,點解淨係收綠化帶非原居民村起樓,又唔收埋隔離有塊新世界嘅地,留俾佢自己起三座高密度豪宅,今次終於俾我地喺份橫洲報告捉到鐵證。

長達3000頁既橫洲解密英文報告裡面,政府消息人士教哂行頭記者應該睇邊part,根本就冇答到橫洲黑幕一個最關鍵既問題:點解政府收呢邊、唔收個邊,個準則喺邊度?

報告明文訂明須減少影響新世界私人地

廣告

哦,原來今次份解密報告字裡行間有寫,就係寫到明話建議要減少影響新世界在橫洲個個位既私人土地(P4),話以免影響該區既發展計劃,但係就再冇其他理據支持。 (原文參考報告部分「初步建議選項」第2.2.1.3)

然後報告就修訂咗收地劃界範圍,比原本嘅方案收多咗少少新世界部分囤積土地,變相令橫洲發展計劃,可以同新世界個發展計劃無縫接駁,同時又收少左原居民丁地,做成非原居民就要急急被滅村,當地鄉紳既丁就可以慢慢套嘅局面。

廣告

明明新世界個計劃,到依一刻都未同城規會申請到發展權,只係一堆雜草,政府根本唔應該因為佢囤左堆農地,就要配合佢起豪宅。如果政府覺得呢個係一貫做法嘅話,大家就明哂點解政府偏要揀新界東北農地發展嘅真正原因,代表所有新界既土地發展計劃,都係官商鄉黑。

顧問公司同時負責新世界申請 新世界或屬摸底對象之一

雖然我都識好多朋友都係做緊規劃顧問,但唔好意思,今次收錢負責做呢份報告既奧雅納(ARUP)都真係好有可疑。政府今次用黑筆劃走哂報告裡面既奧雅納負責人資料,但被記者喺另一份文件揭發由奧雅納多人準備,咁事實上有幾多個人準備份文件? 有冇人又係一齊負責新世界個發展申請? 奧雅納喺份報告咁樣建議收地劃界配合新世界,雖然可能冇諗過事件會曝哂光,但唔覺得自己食兩家茶禮好有問題架? 重要喺份報告裡面,冇理據解釋點解會建議唔好攪到新世界塊地,你間公司以後重講咩獨立專業性?

亦有另一個可能,係間顧問公司只係政府嘅擋箭牌,俾啲錢買保險,其實係政府塞咗啲摸底決定入份顧問公司報告裡面,然後叫佢地修改吓條邊界,如果係咁成件事就真係黑上加黑,代表政府除左同曾樹和梁志祥之流摸底之外,新世界都係其中一個摸底之列,咁就係所謂官商勾結嘅真身啦。

立法會宣誓風波期間公開 搏大家睇唔到

講番個規劃,本來橫洲報告中建議政府會在條路最尾端有個球場,依家新世界痴著嘅豪宅計劃,將會隊埋條路入番個橫洲計劃裡面,隊到個球場冇左影,即係話唔好以為地產霸權只係影響你既居住問題,依家就年橫洲工業都唔知去橫洲邊度有得打波! 關心體育政策既朋友係時候出動啦。

簡單黎講,橫洲報告喺立法會宣誓事件個陣偷雞解密,公開咗搏大家時運高睇唔到,認真花啲時間睇其實係黑上加黑(在此多謝仍沒有放棄追查既研究成員及記者朋友)。呢個問題一定要講到出去,唔好俾佢蒙混過關,官商鄉黑繼續肆虐,大家未來都冇運行。

附:

有線新聞: 橫洲摸底後僅發展第一期

橫洲解密報告(原文)

(原文刊文作者 facebook,文題、小題為編輯所擬)

發表意見